DILI, 05 abríl 2021 (TATOLI)—Responsável ba ekipa Fly Timor, Pedro M. Carrascalão, hanesan timor-oan ida ne’ebé mak serbisu iha área aéreu, deklara prontu fasilita espasu aviaun hodi tula karga gratuita ba Governu Timor-Leste hodi responde ba situasaun emerjénsia hanesan dezastre naturál ne’ebé daudaun akontese.
Nia haktuir, pesoalmente charter ona aviaun hosi Malindo Air no kompleta ona pagamentu ba iha Malázia iha loron 01 marsu liubá hodi semo mai Timór hosi Kuala Lumpur iha 16 abríl atu halo repatriasaun sidadaun timor-oan sira iha Brazíl, Inglaterra, Irlandia, South Korea, Indonézia, no Portugal.
Tuir planu, aviaun sei sai hosi Kuala Lumpur tuku 02:40 dadeer hodi Terminal 1 KLIA no to’o iha Aeroportu Internasionál Prezidente Nicolau Lobato, Dili, iha tuku 08:00 iha loron 16 abríl.
“Maski aviaun laran iha kadeira 180, maibé hau limita ba kadeira 110 de’it hodi bele aumenta kapasidade kargu ne’ebé ha’u ein nome ha’u-nia ekipa Fly Timor hodi bele fasilta espasu karga gratuita ba ita-nia Governu bele hatama sasán urgente ne’ebé nesesáriu hosi Kuala Lumpur mai Dili,” Pedro Carrascalão informa liuhosi ninia pajina, ne’ebé Agência TATOLI asesu, iha segunda ne’e.
Nia mós konfesa katak komprende tebes situasaun membru Governu ne’ebé daudaun preoukupadu atende hela kestaun urjente iha ámbitu dizastre naturál.
Tanba ne’e, nia parte hato’o ba Primeiru-Ministru, Taur Matan Ruak, Ministériu Negósiu Estranjeiru no Kooperasaun, Ministériu Solidariedade Sosiál no Inkluzaun, Ministériu Saúde no Ministériu Transporte no Komunikasaun, relasiona ho kestaun ne’e.
Daudaun ne’e, ninia ekipa organiza ona iha parte kompleksu sira.
“Hau-nia ekipa organiza ona parte komplexu ne’ebé koordena aviaun, crew, pasajeiru hosi nasaun barak, inklui organiza station manager airlines sira iha nasaun orijen pasajeiru hodi bele check-in iha sira-nia nasaun orijen atubele kontinua semo mai Dili liuhosi Kuala Lumpur,” nia hatutan.
Aleinde ne’e, halo mós teste orbrigatóriu tuir protokolu ida-idak ninia nasaun antes tama aviaun.
Tanba ne’e, hodi fasilita serbisu di’ak no organizadu, maka emprezáriu timor-oan ne’e persiza kooperasaun ho parte Governu ne’ebé hakarak aproveita espasu karga gratuita.
Aviaun ne’e rasik halo ona pedidu ‘Flight Aproval’ bele tama Dili hosi Autoridade Aviasaun Sivíl Timor-Leste (AACTL, sigla portugés) iha loron 27 marsu, ba repatriasaun ka humanitarian charter flight hanesan mós voo sira seluk ne’ebé durante ne’e tama iha Timor -Leste.
“Iha tempu badak ne’e, persiza kooperasaun hosi Governu hodi hamutuk bele organiza espasu kargu ne’ebé ami fasilita gratuita ba Governu atu buat hotu la’o ho di’ak no organizadu. Ha’u perfere Governu utiliza ami-nia espasu kargu gratuita do que utiliza osan ba aluga fali aviaun, nune’e osan ne’e bele uza fali atende vítima ne’ebé presiza asisténsia imediata,” nia subliña.
Nia saliente, karik Governu laiha interese ba espasu karga aviaun ne’e, bele mós hato’o hikas ba sira hodi fasilita fali emprezáriu sira ne’ebé hakarak hatama sasán balun hodi bele ajuda komunidade ho sasán balun.
Jornalista: Antónia Gusmão
Editora: Julia Chatarina
