DILI, 05 abríl 2021 (TATOLI)—Inundasaun iha domingu madrugada iha kapitál Dili rezulta vítima sira tenke buka fatin provizóriu hodi salva-an no sasán importante sira, tanba ne’e Governu liuhosi Ministériu Solidaridade Sisiál no Inkluzaun (MSSI) no Sekretaria Estadu Protesaun Sivíl (SEPS) transforma edifísiu públiku balun hodi sai mahon.
Tuir nota ne’ebé Agência TATOLI asesu, segunda ne’e, fatin neen hanesan edifísiu protesaun sivíl besik ema 800, Crus Vermelha de Timor-Leste (CVTL) iha Bairro Formosa iha 300, Liceu Universidade de Timor-Leste (UNTL) 300-resin, edifísiu Ministériu Finansa 900, salaun Dom Bosco 500, no Infordepe Vila-verde 400.
“Númeru vítima ne’ebé evakua ba fatin hirak ne’e seidauk serteza,” esplika nota ne’e.
Aleinde ne’e, Vise-Ministra Solidaridade Sosiál no Inkluzaun, Signi Candrawati Verdial, hamutuk ho Sekretáriu Estadu Protesaun Sivíl, Joaquim Gusmão dos Reis Martins, no Diretór Jerál Protesaun Sivíl, Ismael da Costa Babo, no Diretór Agostinho Cosme Belo, tun direta ba terrenu hodi observa no orienta ekipa prepara fatin ba vítima.
Aleinde ne’e, halo mós enkontru ho ho ajénsia internasionál, parseiru internasionál no nasionál inklui liña ministeriál relasiona ho dezastre naturál, ne’ebé konsidera hanesan kalamidade boot.
“Husu atu ativa filafali sentru Sekretariadu ba Jestaun Dezastre hodi simu dadus no responde vítima dezastre naturál no atu tun diretamente ba fatin evakuasaun iha fatin ne’ebé mak vítima sira evakua hodi salva sira-nia an,” refere nota hosi SETP.
Tuir levantamentu dadus provizóriu, nota mós katak vítima sira presiza ai-han.
“Ami menus rekursu maibé sei la hamate ami-nia vontade tanba ami forsa nafatin ho kooperasaun di’ak hosi parseiru sira no sempre tenta fó informasaun ne’ebé mak loos,” subliña nota ne’e.
Jornalista: Natalino Costa
Editora: Julia Chatarina
