DILI, 08 abríl 2021 (TATOLI)-Primeiru-Ministru Taur Matan Ruak ho nia Vise-Primeira Ministra Armanda Berta dos Santos no Vise-Primeiru no Ministru Planu no Ordenamentu, José Reis, ohin, informa asuntu importante rua ba Prezidente Repúblika Francisco Guterres Lú Olo, iha PR nia rezidénsia Faról, Dili.
Asuntu rua, tuir Xefe Governu ne’e katak dahuluk mak dezastre naturál ne’ebé ho nia konsekuénsia mak afeta inundasaun hodi estraga sasan inklui ema lakon vida no daruak maka ko’alia kona-ba COVID-19 ne’ebé horiseik hahú ona halo vasina.
“Ita hotu hatene iha loron hirak nia-laran ne’e medida saida mak Governu hanoin atu toma nune’e minimiza no normaliza fali situasaun”, Primeiru-Ministru Taur Matan Ruak informa, bainhira halo enkontru semana nian iha kinta ne’e.
Kona-ba dezastre naturál ne’e, Primeiru-Ministru hateten, ninia estragu ne’e boot tanba ema lakon vida 42, lakon uma besik rihun rua no totál populasaun iha rihun sanulu-resin tolu ne’ebé mak refujia iha fatin-fatin.
Naturalmente iha ne’e, iha grupu tolu; primeiru mak populasaun sira-nia uma lakon totalmente, ida seluk sei halo levantamentu para hatene lakon uma totál ne’e no iha fatin ne’ebé-ne’ebé para depois tinan oin mai oinsá bele apoiu sira. Segundu, ema ne’ebé mak sei iha uma maibé sei fahe tan grupu tolu. Ida aat liu, rua médiu no tolu presiza hamoos fali de’it.
“Ho ne’e, Governu halo levantamentu hotu no prepara planu atu ajuda ita-nia sidadaun sira no hadi’a fali ita-nia infraestrutura ne’ebé iha”, PM akresenta.
Taur Matan Ruak subliña infraestrutura hosi mota Comoro nian ne’ebé baliza Munisípiu Aileu nian to’o tasi pratikamente moru ka bronjong bee lori hotu inklui estrada pedasuk balun monu ba mota laran. Aleinde Comoro, mota Maloa, Becora, Becusi, Loes no mota Nunura nian ne’ebé aat hotu kauza hosi dezastre naturál.
Ho situasaun ne’e, tuir Xefe Governu, nia kustu avaliasaun jerál kuaze ultrapasa juta atus ida, tinan kotuk $30 milhões no ba tinan ne’e 100 milhões resin.
“Ne’e ita tenke hadi’a. Se ita la hadi’a maka tinan oin mai kapitál Dili sei naben tiha. Entaun Governu prepara depois de limpeza presiza avansa liután bele estabiliza situasaun populasaun sira-nian no atividade sira bele normál fila-fali”, nia dehan.
Iha asuntu daruak, PM Taur hateten, ko’alia kona-ba COVID-19 ne’ebé horiseik hahú halo vasina, PM Taur hateten, ne’e sinál di’ak. Ho ida-ne’e, Governu kontinua halo esforsu atu sidadaun hotu hetan vasina AstraZeneca.
“Governu esforsu atu sidadaun hotu hetan vasina, pelumenus tinan ne’e ramata maior parte timoroan hotu bele hetan vasina hotu”, Taur Matan Ruak afirma.
Daudaun ne’e iha serka sanitária, ezekutivu ne’e dehan katak Governu la hasai serka sanitária maibé Governu fleksibiliza medida, ezemplu loja sira bele loke hodi populasaun sira halo movimentu sosa materiál konstrusaun tanba mosu tan dezastre naturál nune’e Governu fó fleksibilidade.
“Liga ho asuntu refere, ita iha orsamentu ratifikativu iha ona Parlamentu Nasionál konsentra ba 200 milhões de dólares ba iha área rua de’it. Área ida mak ba COVID-19 hodi finansia sala situasaun hanesan atividade PNTL no Ministériu sira-nia para kombate COVID-19 no ida seluk mak ba ai-moruk vasina inklui situasaun ekonómiku no sosiál”, PM relata.
Nia dehan, hosi ne’e, iha mós medida balun ba estudante no traballadór inklui emprezáriu sira. Medida ida-ne’e atu rekupera ekonómiku.
Jornalista: Osória Marques
Editór: Cancio Ximenes
