LIQUIÇA, 10 abril 2021 (TATOLI)–Kordenadór Levantamentu Dadus ba Afetadu Inundasaun Ministeriu Solidaridade Sosial no Inkluzaun (MSSI) Munisipiu Liquiça, Deonisio de Jesus da Costa, hateten bazea ba orientasaun hosi nasionál mak daudaun ne’e sira halo hela levantamentu dadus ba vítima dezastre natural iha Liquiça.
Notísia Relevante: Uma 100-resin iha Tibar hetan estragus
Nia hatutan, orientasaun ne’e hosi nasionál liuhosi Dirasaun Nasionál Inkluzaun Komunitária nian, atu rekolla dadus ne’ebé haree liu ba totál labarik, inan isin-rua, ferik no katuas, no ema defisiente sira hira mak afetatadu no sai vítima ba dezastre naturál ne’e.
“Dadus provizóriu kona-ba vítima dezastre naturál sira-nian mak feto hamutuk na’in-289, mane na’in-320 ho totál hamutuk 609 hosi famila uma-kain hamutuk 109. Kona-ba labarik kiik ho idade hahú hosi 0 to’o tinan 5 ne’e, feto hamutuk na’in-49 no mane na’in-57, totál hamutuk na’in-106. Labarik idade 6-17 ita hetan feto na’in-66 no mane na’in-91ho total hamutuk na’in-157. Inan isin-rua hamutuk na’in-15, inan ne’ebé fó susu bebe na’in-17, ema ne’ebé defisiente hamutuk mane na’in-neen (6) no feto na’in-lima (5) no idozu invalidu ne’e feto na’in-10 no mane na’in-12. Ida-ne’e, ami identifika liu ba familia sira-ne’ebé sofre hosi dezastre naturál ne’e,” Deonisio de Jesus da Costa hateten ba Agéncia Tatoli iha Tibar, Liquiça, ohin.
Nia dehan, dadus ne’ebé sira hetan iha terrenu ne’e tanba koordena hamutuk ho autoridade lokál hanesan Xefe Aldeia no Xefe Suku sira.
Nia informa, komunidade afetadu ba dezastre naturál ne’e maihosi Aldeia Turleu, Fatnia no Biduku miabé hosi total dadus ne’e seidauk inklui Beduku, tanba ekipa sei halo hela lavantamentu seidauk ramata. Maibé provizória númeru hosi Biduku ne’ebé sira hetan ona ema hamutuk 347 hosi labarik, ferik katus, joven no ema ho defisiénsia.
“Dadus sira-ne’e ami foti de’it pois haruka ba nasionál. Depois haree mak ajuda saida hosi Dili mai mak ita ajuda ba família sira-ne’e. Ajuda emerjénsia mak ita fó ona foos saka 20-resin no supermie balu ba madre sira iha ne’e, hodi tein fahe ba komunidade hirak ne’e liuhosi ita nia kooperasaun hamutuk ho parte relijioza sira,” nia dehan.
Iha parte seluk, MSSI Liquiça servisu hamutuk mós ho Protesaun Sivil Liquiça hodi tulun família vitima sira-ne’e iha parte oioin tuir nesesidade komunidade sira-nian.
“Agora ita tau prioridade liu mak labarik sira-nia nesesidade. Oinsá sira-nia hahan, roupa eskola, kadernu, livru sira ne’ebé mak durante ne’e la aproveita hotu. Entaun dadus sira-ne’e ita rekolla hotu submete ba nasionál hodi haree no apoiu tuir nesesidade komunidade sira-nian,” nia hateten.
Dadauk ne’e, nia informa, vítima dezastre naturál sira ba hela provizóriu ho familia sira-ne’ebé uma la hetan estragus, no levantamentu dadus ne’e sei kontinua la’o nafatin to’o semana oin hafoin haruka ba nasionál.
Jornalista: Hortencio Sanchez
Editór: Cancio Ximenes
