DILI, 12 abríl 2021 (TATOLI)—Família matebian Armindo Borges (47) no Sala Situasaun-Sentru Integradu Jestun Krize (CIGC, sigla portugés) hamutuk ho ekipa saúde, desde ohin dadeer tuku 08:00 to’o kalan ne’e seidauk hetan solusaun kona-ba fatin haloot matebian.
Líder istóriku, Kay Rala Xanana Gusmão, ne’ebé reprezenta família matebian, defende lori mate-isin hodi família haloot tuir tradisaun Timór, maibé kuandu la entrega mate-isin, nia deside toba iha sala izolamentu.
“Ami la lori mate isin ba uma, ha’u toba iha ne’e, maibé ha’u ba toba de’it iha odamatan tama ba izolamentu nian,” Xanana Gusmão hateten ho lian maka’as iha sentru izolamentu Vera Cruz, Caicoli, segunda ne’e.
Antes ne’e, iha dadeer, Ministra Saúde, Odete Maria Freitas Belo, tenta konvense Xanana kona-ba Armindo Borges hakotu iis tanba moras COVID-19, tanba ne’e husu parte família atu koopera ho parte saúde hodi haloot mate-isin tuir protokolu saúde ne’ebé estabelese hosi Organizasaun Mundiál Saúde (OMS).
Notísia relevante: Ministra Saúde husu Xanana atu fiar COVID-19
Governante ne’e mós tenta esplika siklu transmisaun vírus iha família laran to’o komunidade maibé nafatin la konvense.
Tuir informasaun ne’ebé Jornalista Agência TATOLI rekolla iha terrenu, daudaun iha ona sinál katak posibilidade atu entrega ba família maibé halo tuir protokolu COVID-19 nian.
Maski nune’e, seidauk iha desizaun finál hosi Governu atu entrega mate-isin ba família.
Jornalista: Florêncio Miranda Ximenes
Editora: Julia Chatarina
