DILI, 13 abril 2021 (TATOLI)—Ministru Asuntu Parlamentar no Komunikasaun Sosiàl (MAPCOMS, sigla-portugés), Francisco Martins da Costa Pereira Jerónimo, segunda ne’e, asina kontratu ho mídia imprime tolu atu públika publisidade ‘Prevensaun COVID-19’ no ‘Mensajen Vasina AtraZaneca Kontra COVID-19” ne’ebé raliza iha salaun enkontru Gabinete MAPKOMS, Palásiu Governu, Dili.
Mídia imprime tolu ne’ebé asina kontratu ho MAPCOMS atu públika ‘Publisidade Prevensaun VOVID-19’ mak Independente, Timor Post, no Suara Timor Lorosae (STL).
“Objetivu hosi asina kontru ida-ne’e hanesan kooperasaun serbisu hamutuk entre MAPKOMS ho diretór sira iha mídia imprime nian hodi hato’o mensajen Governu nian kona-ba oinsá atu prevene aan hosi COVID-19 no mós mensajen Governu nian relasiona ho vasina AstraZaneca,” Francisco Martins da Costa Pereira Jerónimo, hateten iha liuhosi komunikadu imprensa ne’ebé Agência TATOLI asesu, tersa ne’e.
Membru Governu ne’e hateten, kontratu ho mídia tolu ne’e laiha intensaun seluk ne’ebé kesi jornalista sira tuir MAPCOMS nia hakarak, maibé intensaun mak hakarak serbisu hamutuk ho mídia sira ho papél ida atu luta kontra COVID-19.
“Ami laiha intensaun seluk hosi asina kontratu ida-ne’e, maibé ami-nia intensaun mak hakarak serbisu hamutuk. Ita-boot sira halo ita-boot sira-nia papél, ami hala’o ami-nia papél. Maibé, iha papél ida atu luta kontra COVID-19 ne’e, ita hotu nia nian,” Membru Governu ne’e dehan.
Tanba, nia hateten, atu kontra COVID-19 ne’e la’ós Governu, sosiedade sivíl, Estadu tomak nia servsu de’it maibé inklui jornalista sira hotu nia servisu atu luta ba prevensaun ida-ne’ebé di’ak.
“Tanba fó sai informasaun liuhosi mídia, ita bele halo vasina ida-ne’ebé di’ak atu nune’e ita nia populasaun sira bele hela hakmatek, atu ba futuru sira mós bele halo no umanidade ba sira, nune’e forte atu bele luta hasoru moras ida-ne’ebé mak ita nunka hatene bainhira mak hotu,” nia hateten.
Liu husi Apoiu ida ne’e, MAPKOMS mos salienta ba mídia nain sira katak, agora situasaun ida-ne’ebé difisil ba ema hotu, tanba ne’e mak Governu nia posibilidade liuliu MAPKOMS atu bele fó no halo kooperasaun ho mídia sira-ne’e.
Entretantu, Diretór STL, Salvadór J. Ximenes Soares hato’o agradesimentu ba Governu liuliu MAPKOMS tanba bele halo kooperasaun ba mídia ne’eb’e nia lidera.
“Ida-ne’e hanesan fó tulun ba ami hosi mídia imprime nian tanba iha tempu ida hanesan mós ami atu hetan publisidade hosi parte kompañia sira, hosi parte Governu mós difisil la halimar. Maibé liuhosi tulun ida-ne’e fó tebes ba ami no parte seluk, karik ba futuru ita bele serbisu di’ak liután atu ita bele tulun malu lori Governu ida-ne’e hetan susesu no mós COVID-19 mós bele hetan solusaun ba hapara nia korrente hada’et iha Timor-Leste,” Salvadór J. Ximenes Soares hateten.
Iha fatin hanesan, Diretór Independente, José Sarito mós hato’o agradese ba Governu liuliu ba MAPKOMS ne’ebé halo ona kooperasaun ho jornál sira inisiálmente oinsá bele hamutuk hodi kontra COVID-19 ne’e, no oinsá mak bele kontinua fó informasaun ida loloos ba públiku liliu kona-ba prosessu vasinasaun AstraZaneca ne’e ba ema hotu.
Jornalista: Arminda Fonseca
Editór: Cancio Ximenes
