DILI, 18 abríl 2021 (TATOLI)—Abitante 108 iha Aldeia Temporál, suku Lahane Orientál, Munisípiu Dili, ne’ebé afetadu ba dezastre naturál, hetan apoiu nesesidade bázika hosi grupu voluntáriu Mission Timor Viqueque Community Center (MTVCC). Apoiu hirak-ne’e mak hanesan foos, mina, susu-been, super mie, masin, sabaun no seluk tan.
Jestór Projetu MTVCC, João Damião S. Prawin, hateten abitante ne’ebé hetan apoiu nesesidade bázika ne’e kompostu hosi estudante na’in 78, inan isin-rua na’in-hitu no bebé iha 23.
Notísia relevante:Primeiru-Ministru: Família 25.709 afetadu ba dezastre naturál
“Abitante hirak ne’e la hela iha kampu refijiadu. Sira hela iha ida-idak nia uma, maibé sira afetadu mós ba inundasaun ne’ebé akontese iha 04 abríl,” João Damião S. Prawin hateten ba jornalista Agênsia Tatoli iha rezidénsia Lahane Orientál, domingu ne’e.
Asaun karitativa ne’ebé grupu ne’e oferese, hetan apoiu fundu $1.000 hosi belun di’ak Michella Ana Lipscomb no Jason Washfold hosi sidade Quensland, Austrália.
“Fundus ne’e ita fahe ba fatin rua mak hanesan, Dili no Viqueque. Dili ita tau $550 no Viqueque $450. Iha Dili ita halo ona ba populasaun 108 iha Bairru Temporál no Viqueque ita sei hala’o iha segunda ba família 40,” nia esplika.
Estudante 78 ne’ebé hetan apoiu nesesidade bázika iha Bairru Temporál ne’e mai hosi Munisípiu Viqueque, Baucau, Manatuto, Ainaro, Covalima, Bobonaro, Liquiça no Manufahi.
Jornalista: Tomé Amado
Editór: Cipriano Colo
