DILI, 27 abríl 2021 (TATOLI)—Konsellu Administrasaun Fundu Infraestrutura (KAFI) konvoka reuniaun hodi hahú diskute orsamentu empréstimu ba projetu alargamentu estrada Rotunda Comoro to’o Tasi-tolu, ne’ebé presiza aselera tanba sai rekezitu ba projetu Portu Tibar ne’ebé tuir planu sei finaliza iha tinan oin.
“Ami tenta atu aselera, tanba ne’e tama ona iha prosesu aprovizionamentu. Nune’e ohin diskute oinsá mak dudu prosesu ba oin tanba konstrusaun Portu Tibar sei hotu iha maiu 2022, maibé rekezitu ida mak estrada rotunda to’o Tasi-tolu tenke hotu,” Prezidente KAFI, José Maria dos Reis, relata hafoin ramata reuniaun, iha salaun Ministériu Finansa, Aitarak-laran, tersa ne’e.
Atuál Vise Primeiru-Ministru no Ministru Planu no Ordenamentu ne’e fó ona instrusaun ba tékniku sira atu aselera pagamentu ba abitante afetadu sira ne’ebé kuaze na’in-ualu mak seidauk inklui Eskola São Miguel Arcanjo, atubele hahú konstrusaun.
Asian Development Bank (ADB) impoin rekezitu ba Governu Timor-Leste, tenke rezolve problema afetadu no iha lisensa ambientál inklui sira seluk hafoin aprova empréstimu finansia obra ne’e.
Iha biban hanesan, Diretór Jerál Obra Públika, hosi Ministériu Obra Públika (MOP), Rui Heranani, informa, Governu liuhosi ministériu implementadór projetu fó ona indemnizasaun to’o faze datoluk ba abitante afetadu konstrusaun projetu estrada hosi Rotunda Comoro to’o Tasi-tolu hamutuk 144, maibé falta afetadu ualu.
“Ami tenke rezolve lai, tanba ne’e filafali ba planu orijinál ne’ebé agora ami presiza finaliza afetadu ualu ne’e hafoin tama ba faze tuir mai,”nia dehan.
Daudaun ne’e, afetadu ualu ne’e ninia prosesu iha faze finál iha daudaun iha Ministériu Justisa, parte Terras no Propridade.
“Espera sira finaliza lalais atu halo fali negosiasaun ho São Miguel Arcanjo. Ami-nia Diresaun Edifikasaun halo verifikasaun presu no alterasaun montante millaun $1 ba leten, tanba ne’e ami presiza halo negosia fali atubele aseita ho montante indemnizasaun,” nia subliña.
Nune’e, Diretór Jerál ne’e husu ba abitante afetadu ne’ebé hetan ona pagamentu, atubele husik ona fatin atu hafasil prosesu konstrusaun estrada iha área refere.
“Ita husu ba sira ne’ebé simu ona idemnizasaun, di’ak liu mak husik ka hamamuk ona fatin ne’ebá,” nia sujere.
Enkuantu, kustu indemnizasaun hamutuk milaun $1,6-resin, hahú hosi pagamentu faze dahuluk iha setembru ba afetadu 46 ho valór $679.000, faze daruak iha 29 setembru 2020 ho totál afteadu 65 no totál indemnizasaun $846.000 no pagamentu ba faze datoluk iha novembru 2020 ba abitante 23 ho orsamentu $131.000.
Estrada Rotunda Comoro to’o Tasi-tolu ne’eho distánsia kilómentru rua hamutuk ho pakote estrada trosu Tibar to’o Tasi-tolu, ne’ebé toma konta hosi kompañia internasionál China Wuyi ho kustu millaun $12-resin, hahú iha loron 28 fevereiru 2019 to’o outubru 2019.
Jornalista: Florêncio Miranda Ximenes
Editora: Julia Chatarina
