DILI, 28 abríl 2021 (TATOLI)—Primeiru-Ministru (PM), Taur Matan Ruak, konvoka enkontru ho Embaixadór Estadu Unidu Amérika (EUA) iha Timor-Leste, Charles Kevin Blackstone, hodi ko’alia kona-ba situasaun atuál iha rai-laran inklui vasina kontra COVID-19.
“Ha’u informa ba Primeiru-Ministru maibé seidauk iha informasaun espesífiku kona-ba apoiu vasinasaun, maibé hahú agora bele koordena ho ami-nia Governu no espera katak iha tempu badak iha resposta,” Embaixadór dehan hafoin enkontru ho Xefe Govenu, iha Rezidénsia Farol, kuarta ne’e.
Tuir diplomata ne’e, vasina ne’ebé atu oferese ba Timor-Leste seidauk bele fó hatene tanba sei iha diskusaun, maibé iha posibilidade disponibiliza AstraZeneca
“Bainhira atu fó, presiza haree lai kualidade vasina ne’e rasik liuliu produsaun. Karik fulan hirak mai ami bele oferese vasina ne’ebé iha hela, maibé ha’u labele ko’alia lai tanba sedu liu atu fó hatene,” nia akresenta.
Aleinde ne’e, parte rua halo mós diskusaun kona-ba dezafiu iha Timor-Leste hanesan inundasaun no COVID-19.
“Espesífiku liu, ha’u ko’alia ho Primeiru-Ministru kona-ba COVID-19 tanba nia mak lidera hela esforsu atu ko’alia ho parseiru sira atu apoia no buka solusaun ba propagasaun COVID-19 iha kapitál Dili no munisípiu sira,” nia hatutan.
Iha tinan 2020, Governu EUA oferese fundu millaun $1,6 ba Timor-Leste hodi solisiona COVID-19, hanesan dezinfetante, protesaun pesoál no apoiu Polísia nasionál Timor-Leste (PNTL) iha fronteira sira.
“Ha’u espera iha semana tuir mai ha’u bele anúnsia fali apoiu foun ba Timór. Ko’alia mós apoia ba Governu Timor-Leste hodi responde ba inundasaun,” nia subliña.
Jornalista: Antónia Gusmão
Editora: Julia Chatarina
