DILI, 28 abríl 2021 (TATOLI)-Diretora Finansas Administrasaun Munisípiu Dili, Ana Fernanda Junior hateten, Orsamentu Jerál Estadu (OJE) 2021 ba Munisípiu Dili ho montante $9.058.594 nia ezekusaun foin atinje 17.8%.
“Foin daudaun OJE 2021 ne’ebé aloka ba Munisípiu Dili hamutuk $9.058.594, ami ezekuta 17.8%, hahú hosi saláriu vensimentu, transferénsia servisu no bens servisu,” Ana Fernanda Junior informa ba Agência Tatoli liuhosi telefónika, kuarta ne’e.
Nia esklarese, OJE 2021 ne’ebé ezekuta ona 17.8% ne’e mak hanesan ba saláriu vensimentu 20%, bem servisu 22%, transferénsia públika mak 13%, ne’e inklui merenda Eskolár no orsamentu subsídiu ba lideransa komunitáriu 100%, maibé merenda eskolár mak seidauk implementa tanba situasaun serka sanitária.
Kona-ba kapitál dezenvolvimentu, nia dehan, agora seidauk la’o tanba vizaun dezeñu sira ne’e iha Ajénsia Dezenvolvimentu Nasionál (ADN) halo tiha revizaun no ADN identifika tiha nia divizaun mak foin bele loke konkursu públiku ba kapitál dezenvolvimentu nian.
Munisípiu Bobonaro foin atinje 20%
Hosi sorin seluk, Prezidente Autoridade Munisípiu Bobonaro, Zeferino Soares dos Santos informa, ezekusaun Orsamentu Jerál Estadu (OJE) 2021 ba Munisípiu Bobonaro montante $5.331.750 foin atinje 20%.
“Ezekusaun OJE 2021 ne’ebé aloka mai iha Munisípiu Bobonaru hamutuk $5.331.750, ami foin ezekuta 20%, hahú hosi saláriu vensimentu, transferénsia públiku no bens servisu,” Zeferino Soares dos Santos hateten liuhosi telefónika.
Kapitál menór nia dehan, foin iha prosesu administrativa konkursu públiku ba materiál viatura no komputadór ba iha administrativu no mós ba sekretáriu iha Munisípiu Bobonaru nian.
Kona-ba kapitál dezenvolvimentu, nia haktuir, daudaun ne’e sira seidauk bele book tanba orsamentu ba kapitál dezenvolvimentu, iha orsamentu retifikativu ne’e ko’a fali 60% ba COVID-19 no kalamidade.
Nia argumenta, durante sira ezekuta OJE 2021, buat hotu la’o di’ak, maibé dezafiu ne’ebé sira mak orsamentu ba merenda eskolár.
“Eskola hahú iha janeiru maibé orsamentu sai tarde tanba depende ba polítika Governu nian, entaun ita ezekuta la to’o 100%, maibé sei halo esforsu nune’e tinan oin, ami bele halo di’ak liután,” nia hateten.
Munisípiu Lautem foin ezekuta 21%
Administradór Munisípiu Lautem, Domingos Sávio, informa ezekusaun Orsamentu Jerál Estadu (OJE) 2021 aloka ba Munisípiu Lautem ho montante $4.415.566.00, foin atinje 21%.
“OJE 2021 ne’ebé alokadu mai Munisípiu Lautem hamutuk $4.415.566.00, foin atinje 21%, inklui ba saláriu vensimentu, bens servisu, transferénsia públika,” Domingos Sávio ba Agência Tatoli liuhosi telefónika
Nia esklarese, hosi OJE 2021 ho montante $4.415.566.00 ne’ebé aloka ba Munisípiu Laútem hodi halo servisu munisipál ba Quarter Primeiru (QI) nian mak hanesan, alokasaun ba Sekretariadu hamutuk $2.170.776, ezekusaun $3.78.613.010 nia porsentu ezekusaun 17%, ba alokasaun saúde $232.037.00, ezekusaun $65.467.29 nia porsentu ezekusaun 28%.
Nune’e mós alokasaun ba edukasaun hamutuk $1.225.074, ezekusaun $284.001.39 nia porsentu ezekusaun 23%, ba agrikultura alokasaun $421.286, ezekusaun $152.543.30, porsentu ezekusaun 36%, no alokasaun ba Obras Públika no Transporte $86.272.00, ezekusaun $ 20.310.50, porsentu ezekusaun 24%.
Alokasaun ba Agua Saneamentu Báziku Ambiente hamutuk $160.954.00, ezekusaun $34.451.75, ninia porsentu ezekusaun 21%, Jestaun Merkadu no Turizmu alokasaun $24.684.00, ezekusaun 0.00, nia porsentu ezekusaun 0%, nune’e alokasaun Rejistu Notariadu $20.964.00, ezekusaun 0.00 porsentu ezekusaun 0%, no alokasaun ba asaun sosiál $73.879.00, ezekusaun $12.872.00, nia porsentu ezekusaun 17%.
“Entaun hosi alokasaun ba Q1 hamutuk $4.415.566, ba ezekusaun $948.259.033 no totál persentajen ba Q1 hamutuk 21%,” nia hateten.
Kona-ba kapitál menór, nia dehan, orsamentu hamutuk $81.150.00 entaun daudaun ne’e servisu hanesan baibain tanba sosa ona materiál eskritóriu no ekipamentu ba administrasaun munisípiu nian ne’ebé la’o di’ak.
Ba kapitál dezenvolvimentu nia haktuir, osan montante $430.907.00 maibé orsamentu retifikativu Governu ko’a fali 60% ba situasaun COVID-19 no kalamidade.
Jornalista : Arminda Fonseca
Editór : Francisco Simões
