DILI, 30 abríl 2021 (TATOLI)—Sala Situasaun Sentru Integradu Jestaun Krize (SIJK) rejista kazu pozitivu COVID-19 hamutuk 86, rekoperadu 47 no totál kazu ativu 1.162.
“Totál kazu konfirmadu kumulativu sura hosi 21mMarsu 2020, hamutuk 2.276. Dadus jerál ba loron ohin, detetadu 86 mai hosi Dili 77, no Munisipiu siraseluk sia. Kazu rekoperadu na’in 47, totál kazu ativu 1.162,’’ Koordenadór Forsa-Tarefa ba Prevensaun no Mitigasaun, Rui Maria de Araújo hateten liu hosi komunikadu ne’ebé, sesta ne’e.
Notísia relevante:COVID-19: pozitivu 66, rekoperadu 47 no ativu 1.123
Hosi totál kazu detetadu foun ohin mane 57 no feto 29, sintomátiku na’in 11, asintomátiku hsi 75 (87,2%).
Ohin iha na’in 22 (25,5%) mak detetadu tanba atu viajen ba Munisípiu ka ba estranjeiru, hafoin deteta pozitivu.
Husi horisehik mai ohin, hamutuk hotu Laboratóriu Nasionál Saúde halo testes PCR 1.294, ho detalla hanesan tuir mai, Vijilánsia sentinela 64, Rastreiu ba kontaktu ka Contact tracing 151, Rastreiu Aleatóriu ka Random Screening 505, Viajen sai hosi serka sanitária Munisípiu Dili 513, Viajen internasionál 36, Follow up iha kuarentena 25.
Totál testes PCR ne’ebé halo horisehik 28 abríl iha Munisípiu sira seluk hamutuk 411, ho detalla hanesan tuir mai, Baucau 137, Maliana 45, Maubisse 106, Suai 24, Viqueque 99, teste follow up ba sira iha fatin izolamentu 75 (47 negativu ona, 28 sei nafatin pozitivu).
Evolusaun surtu COVID-19 iha Munisípiu Dili, atu bele hatene surtu ida ninia evolusaun, no mós surtu ne’e aumenta ka diminui, indikadór seluk ne’ebé matenek-na’in epidemiolojia-nian uza, maka insidénsia.
Konvensionalmente insidénsia sukat totál kazu foun kada loron pur abitante rihun 100, no hatudu risku ne’ebé populasaun iha atu hetan da’et moras ida.
Loron hirak liu bá, publika ona prevelénsia ne’ebé sukat persentajen hosi ema ne’ebé detetadu hetan moras ida, iha populasaun nia le’et, no hatudu problema moras ne’e bo’ot to’o iha ne’ebé.
Hahú ohin, sei publika gráfiku insidénsia iha Munisípiu Dili, hahú fulan marsu 2021 iha aumentu maka’as kazu detetadu iha Dili, no hahú 3 abril kazu aumenta maka’as liu tan.
Durante loron hitu ikus, media (rata-rata) insidénsia COVID-19 iha Dili kada loron 28,2/abitante rihun 100.
Hanesan komparasaun, media insidénsia kada loron iha India 22.5/abitante rihun100, Indonézia ninia media insidénsia kada loron maka 1,9/abitante rihun 100. Brasil ninian 27,4/abitante rihun 100 no EUA 18,1/abitante rihun 100.
Informasaun adisionál iha 30 abril de 2021, izolamentu Vera Cruz iha kazu detetadu na’in 23. Iha área obstetrisia na’in-hitu, medisina interna na’in 12, pediatria nai’n-tolu. Sira na’in-hitu iha obstetrisia, kategoria moderadu hotu, sira-nia kondisun estável.
Kazu sirurjia ida, tanba asidente tráfiku horisehik no iha severe head injury no detetadu pozitivu COVID-19 oras ne’e uza hela oxijéniu.
Sira na’in 12 iha medisina interna, tolu grave, na’in-sia moderadu. Husi grupou grave, ida ne’ebé uza ventiladór. Sirurjiaun Timoroan-sira halo tracheostomia iha Vera Cruz, hodi bele fasilita nia dada-iis, maski tenki nafatin uza ventiladór. Ninia kondisaun to’o ohin, estável.
Na’in-rua seluk ne’ebé grave, uza oxijéniu ho mask. Kazu tolu pediatria, rua moderadu, na’in-ida grave. Na’in ida grave uza CPAP, no rua moderadu la uza ona oxijéniu.
Apela ba populasaun iha Dili laran no mós iha Munisípiu sira-seluk, atu aprezenta-an iha fasilidade saúde públiku (Sentru Saúde ka Ospitál) ne’ebé besik, bainhira sente isin-manas, ka kakorok moras, ka inus-been, ka mear, hodi bele hetan atendimentu hosi profisionál saúde sira.
Jornalista: Felicidade Ximenes
Editór: Cipriano Colo
