DILI, 03 maiu 2021 (TATOLI)—Durante implementasaun serka sanitária no konfinamentu obrigatóriu iha Munisípiu Dili, Diresaun Nasionál Serbisu Rejistu Notariadu (DNRN), hosi Ministériu Justisa (MJ), fó atendimentu serbisu públiku ba de’it nesesidade urjénsia.
“Despaixu Ministru Justisa, serbisu rejistu notariadu fahe turnu ba funsionáriu kada loron atende de’it emisaun passaporte ho karáter urjénsia hanesan ema moras atu halo transferénsia ba rai-li’ur, diplomata-sira no passaporte serbisu ho nível urjénsia,’’ Diretór Nasionál Identifikasaun Sivíl no Rejistu Kriminál, Victor da Costa Neto, hateten ba Agéncia Tatoli iha kna’ar fatin Colmera, segunda ne’e.
Notísia relevante:Janeiru-marsu DNRN rekolla reseita $126.375
Limitasaun atendimentu ne’e atu bele evita ema halibur-malu barak, no prevene transmisaun COVID-19 ne’ebé númeru pozitivu aumenta kada loron.
Durante atendimentu, diresaun ne’e mós prepara kondisaun oinsá kliente-sira bele fase liman ho sabaun, uza máskra inklui aplika distansiamentu fíziku.
Entretantu, Diresaun Jerál Serbisu Notariadu liu hosi Diresaun Nasionál Identifikasaun Sivíl no Rejistu Kriminál, durante ne’e hala’o atendimentu públiku ba serbisu emisaun passaporte, billete identidade no akizasaun sertifikadu rejistu kriminál.
Jornalista: Nelson de Sousa
Editór: Cipriano Colo
