DILI, 03 maiu 2021 (TATOLI)—Estadu Unidu Amérika (EUA), sei kontinua fó apoiu ba Timor Leste (TL) atu luta kontra COVID-19.
Kestaun ne’e hato’o hosi Embaixadór EUA iha TL, Charles Kevin Blackstone, hafoin enkontru ho Ministra Saúde (MS), Odete Maria Freitas Belo, iha Palásiu Sinzas, Caicoli, Díli, segunda ne’e.
Notísia relevante:Embaixadór EUA buka-hatene prioridade PLP nian iha VIII Governu
“Kontribuisaun ne’ebé EUA fó ona maka millaun $1.6, ne’ebé liu hosi Unicef no OMS fornese ona ekipamentu hanesan máskara no seluk tan ba prevensaun COVID-19. EUA sei kontinua fó apoiu nafatin,” Charles Kevin Blackstone, hateten ba jornalista-sira.
Diplomata ne’e dehan, kooperasaun ne’ebé EUA halo ho Ministériu Saúde bazeia ba prioridade ne’ebé define hosi Ministériu ne’e rasik, nune’e EUA mós kontribui ba fasilidade izolamentu rua hanesan Baucau no Covalima.
Iha fatin hanesan, Odete Maria Freitas Belo, hateten durante enkontru atualiza kona-bá apoiu ne’ebé Governu Amerikanu oferese ona ba TL.
“Antes COVID-19 akontese, ita iha ona embaixadór ne’ebé serbisu hamutuk ho ita. Sira haree liubá konstrusaun, liuliu serbisu kuidadu primáriu hanesan Postu Saúde iha fatin sira ne’ebé izoladu. Depois, iha parte seluk sira mós apoiu liu iha área prestasaun kuidadu primáriu no seluk tan,” nia hateten.
Tanba ne’e, durante enkontru ko’alia mós kona-bá apoiu ne’ebé EUA sei oferese ba MS iha futuru, atu bele kontinua luta kontra COVID-19, no hein katak, kooperasaun sei kontinua di’ak liu tan.
Partisípa iha enkontru ne’e, Diretór Gabinete Planu Polítika Kooperasaun Saúde (DGPPCS), Narcísio Fernandes, no ekipa hosi Embaixada EUA iha Timor-Leste.
Jornalista: Felicidade Ximenes
Editór: Cipriano Colo
