BAUCAU, 16 juñu 2021 (TATOLI)–Xefe suku Uaitame, postu admistrativu Quelicai, munisípiu Baucau, João Morreira, hateten, suku ne’e sei prioritiza hadi’a infraestrutura bázika bainhira ezekuta orsamentu Reziliensia Komunitária no Rekoperasaun Ekonómika (RKRE) liuhosi Programa Nasionál ba Dezenvolvimentu Suku (PNDS).
“Tinan ida-ne’e ami hetan tan $5.000 resin no ami sei tau prioridade ba bee-mos, estrada no eletrisidade ne’ebé mak seidauk realiza iha suku ne’e,” Xefe suku Uaitame hateten iha Sentru Konvensaun Baucau (CCB, sigla portugés), villa antiga, Baucau, kuarta ne’e.
Notísia relevante: PNDS kontinua implementa programa regulár iha Baucau
Líder komunitária ne’e agradese ba Governu Austrália tamba bele apoiu orsamentu atu implementa programa RKRE iha suku Uaitame.
João konsidera, PNDS presiza halo evaluasaun hodi hadi’a ezekusaun orsamentu no programa ne’ebé la la’o ho efetivu, liuliu burokrasia ne’ebé fó impatu ba implentasaun programa, inklui aumenta funsionáriu PNDS atubele kobre suku 15 iha postu Quelicai.
“Ida-ne’e mak loloos PNDS tenki hadi’aa no investe fundu barak, maibé rekursu umanu la sufisiente mós problema boot ida,” nia akresenta.
Tamba ne’e, João husu ministéiru relevante atu foti inisiativa rekruta tan funsionáriu PNDS ne’ebé iha kapasidade naton.
Autoridade suku ne’e hato’o ona proposta ba Institutu Jestaun Ekipamentu (IGE, sigla portugés) atu konsidera ligadu ho estrada iha Uaitame, tamba hosi estrada mak sei bele fasilita transporta materiál kanaliza bee-mos bá aldeia sira.
Nune’e, nia apela atu entidade hotu tenki serbisu hamutuk hodi implementa PNDS, liu-liu kolabora ho autoridade lokál tamba suku mak konsideradu nu’udar na’in ba projeitu.
Antes ne’e, programa regular PNDS ne’ebé hala’o ona iha suku Uaitame mak kanaliza bee-mos bá aldeia Laumana no tuir planu daudaun ne’e sei hadi’a fali estrada kilómetru lima, hafoin atu dada eletrisidade ba komunidade sira ne’ebé seidauk asesu.
Suku Uaitame iha aldeia haat, kompostu hosi Gamana, Sialimu, Gugulai no Karanu, ho totál populasaun 2.821.
Jornalista : Natalino Belo
Editora : Julia Chatarina
