BAUCAU, 17 juñu 2021 (TATOLI)—Xefe suku Kaibada, postu admistrativu Baucau villa, munisípiu Baucau, José Filomeno Agapito Soares Iong, hateten, estrada rurál mak sei sai prioridade dahuluk, tanba konsidera importante iha konetividade hodi kontinua dezenvolvementu iha suku laran.
“Ba suku Kaibada, ha’u foku ba irrigasaun no estrada rurál, tamba liuhosi estrada mak bele transporta rai-henek no fatuk sira hodi halo irrigasaun,” Autoridade lokál ne’e dehan iha Admistrasaun Munisipál Baucau, Villa nova, kinta ne’e.
Nia konsidera, estrada bele kria konetividade entre komunidade inklui fasilita transporta nesesidade importante sira ligadu ho área ekonomia.
Aleinde ne’e, suku ne’e sei atensaun normaliza irrigasaun hamutuk ektare 189 atu atinje ekonomia ne’ebé di’ak liu ba vida Agrikultura.
“Irrigasaun importante tamba bainhira la’o di’ak, komunidade mós susesu halo serbisu natar no to’os,” nia akresenta.
Suku Kaibada liuhosi fundu Programa Nasionál Dezenvolvementu Suku (PNDS), daudaun ne’e ezekuta ona 92,7%, liga ba estrada iha aldeia Haurobu, hosi totál osamentu $41.988,29, inklui halo ona levantamentu pagamentu 50% hamutuk $34.032 ba Kompañia, traballadór inklui indemnizasaun ba rai-na’in ne’ebé fornse rai hodi reabilita estrada rurál.
Povu mak sai na’in ba fundu hosi PNDS, nune’e bainhira programa prioridade sira ne’ebé planeia ona, nafatin envolve komunidade sira iha área Kaibada hodi bele sirkula osan hodi aumenta rendimentu povu Kaibada.
Notísia relevante: PAM Baucau enkoraja autoridade lokál aproveita PNDS rekupera ekonomia
“Sira bele serbisu rasik, bele fornese materiál fatuk ou rai, tamba osan ne’e aloka ba duni sira,” nia hatutan.
Totál orsamentu hosi PNDS ne’ebé aloka ba suku Kaibada hamutuk $39.000 resin.
Suku Kaibada rasik iha aldeia hitu hanesan Maulame, Boru-baha, Data-Ua, Caiobilale, Ana-uaru, Uani-Uma no Haurobu, ho totál populasaun 4.409, hosi uma-kain 981.
Jornalista : Natalino Belo
Editora : Julia Chatarina
