DILI, 18 juñu 2021 (TATOLI)–Primeiru-Ministru (PM),Taur Matan Ruak, konvoka reuniaun ho Eletricidade de Timor-Leste, Empreza Públika (EDTL, E.P) no Bee Timor-Leste, Empreza Públika (BTL, E.P) hodi rezolve problema infraestrutura bázika iha postu administrativu Ataúro, munisípiu Dili.
“Simu orientasaun hosi Primeiru-Ministru hodi haree kondisaun fornesimentu bee iha postu administrativu Ataúro, sé buat hotu la’o di’ak, tinan oin Ataúro sai munisípiu foun, tanba ne’e Primeiru-Ministru orienta ami atu haree kondisaun hodi apoiu,” Prezidente BTL, E.P, Carlos dos Reis Peloi, informa hafoin enkontru ho Xefe Governu, iha Rezidénsia Farol, sesta ne’e.
Notísia relevante: PM husu Ataúro-oan prepara-an tinan oin transforma postu sai munisípiu
BTL, E.P simu proposta ida hosi líder komunitáriu iha aldeia Waruana suku Akrema postu administrativu Ataúro, atu hadi’a sistema bee moos iha sira-nia aldeia.
“BTL simu proposta, maibé seidauk bele responde to’o iha ne’ebá, espera iha tinan ne’e bele halo estudu detail engineering design, nune’e tinan ne’e ita bele lansa projetu konstrusaun iha área ne’ebá,” nia akresenta.
Fatin hanesan, Prezidente EDTL, E.P, Paulo da Silva, hateten tinan ne’e sei promove projetu eletrifikasaun ba suku tolu iha Ataúro, ne’ebé suku rua hanesan projetu foun no suku ida halo manutensaun ba liña ezistente.
“Kona-ba eletridade, Primeiru-Ministru husu planu ba illa Ataúro, tinan ne’e projetu eletrifikasaun ne’ebé EDTL promove sei halo iha suku tolu, ida manutensaun ba liña rezistente iha Maumeta Villa bá Biloi, projetu foun bá suku Makili no suku Makadade,” nia dehan.
Durante ne’e, komunidade iha illa Ataúro utiliza liña eletrisidade iha tempu kalan oras lima de’it, tanba kombustível la sufisiente atu uza ba jeradór hodi fornese eletrisidade oras 24.
“Daudaun ho kapasidade finanseiru mina ne’ebé iha, ita loke oras lima kada loron, ida-ne’e tanba osan ne’ebé aloka ba EDTL,E.P atu sosa to’o de’it ba ida-ne’e, entaun sé liu ita osan laiha atu sosa tan mina, tanba ne’e mak ita jere kada loron oras lima de’it,” Paulo rekoñese.
Ho kestaun ne’e, EDTL,EP tau ona iha planu ba tinan oin atu halo intervensaun no buka opsaun hotu, hodi funsiona eletrisidade oras 24.
Jornalista : Antónia Gusmão
Editora : Julia Chatarina
