BAUCAU, 23 juñu 2021 (TATOLI)–Koordenadór Banku Nasionál Komérsiu Timor-Leste (BNCTL, sigla portugés) munisípiu Baucau, Olímpio da Silva Pinto, hateten, tuir akordu koordenasaun entre Banku, Autoridade lokál no Ministériu Solidaridade Sosiál no Inkluzaun (MSSI), bainhira iha pagamentu subsídiu ba idozu no invalidez ne’ebé labele halo movimentu, parte kompetente sei fasilita.
“Situasaun balun la permite hanesan moras ou membru família laiha, hafoin benefisiáriu sira hakarak foti osan, entaun banku tenke to’o iha sira-nia fatin, maibé antes ne’e tenki iha koordenasaun entre Banku no Autoridade lokál,” Koordenadór hateten ba Agência TATOLI, iha suku Bahu, Baucau villa, kuarta ne’e.
Tuir nia, prosesu pagamentu direita mak hanesan reprezentante família hosi benefísiariu bele halo deklarasaun liuhosi autoridade suku, hafoin hetan vistu hosi admistrasdor postu mak foin hato’o ba BNCTL.
Liuhosi koordenasaun entre BNCTL, MSSI no Ministériu Admistrasaun Estatál (MAE) liuhosi Autoridade lokál, hahú kalendáriu lansa ona, maka MSSI sei distribui kalendáriu ba autoridade postu sira atu hatutan ba komunidade tuir loron pagamentu kada suku no postu administrativu.
Nune’e, nia rekomenda atu benefisiáriu sira hakat ba banku atu trata kartaun ATM, atu nune’e faze tuir mai labele forma tan, maibé idaidak ba foti diretamente ou fó ba família sira hodi foti osan iha makina ATM ne’ebé establese iha munisípiu Baucau.
Entretantu, tuir dadus totál benefísiáriu hamutuk 14.534 iha suku 59, postu admistrativu neen, munisípiu Baucau.
Jornalista : Natalino Belo
Editora : Julia Chatarina
