Governu kria komisaun luta kontra tráfiku ema

DILI, 23 juñu 2021 (TATOLI)–Governu liuhosi reuniaun Konsellu Ministru (KM) aprova kriasaun komisaun luta lontra tráfiku ema nian no define ninia kompozisaun, estrutra no modu funsionamentu, ne’ebé aprezenta hosi Ministru Justisa (MJ), Manuel Cárceres.

“Projetu ne’ebé aprezenta hosi Ministru Justisa ne’e hodi kumpre dispostu Lei kona-ba prevensaun no luta hasoru tráfiku ema,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu iha Palásiu Governu, kuarta ne’e.

Ezisténsia komisaun ne’e hodi asegura koordenasaun interministeriál ninia misaun atu koordena, iha nível nasionál ho entidade oin-oin ne’ebé responsável ba prevensaun no luta hasoru tráfiku ema nian.

Komisaun mós sei responsável atu  promove no asegura kooperasaun ho entidade estranjeira no kombate hasoru tráfiku ema, nune’e mós akompaña aplikasaun dispozisaun konvensaun katak Timor-Leste ratifika ona matéria tráfiku ema.

Iha estrutura ne’e reprezenta servisu oin-oin no entidade públika, liuliu iha área justisa no seguransa, maibé mós reprezentante sira hosi sosiedade sivíl rasik.

Jornalista : Antónia Gusmão

Editora     : Julia Chatarina