BAUCAU, 24 juñu 2021 (TATOLI)–Xefe suku Buruma, postu administratrativu Baucau villa, munisípiu Baucau, Libório dos Santos Freitas, informa, suku ne’e foku kanaliza bee-mos ba aldeia Soli-ua liuhosi orsamentu Programa Nasionál Dezenvolvementu Suku (PNDS) iha tinan 2021.
“Tinan-ne’e ita foku dada bee-mos, ne’ebé daudaun projetu ne’e la’o hela,” Xefe suku, hateten, iha sede suku Buruma, sesta ne’e.
Suku Buruma iha tinan 2021 nia laran hakarak fó prioridade bee-mos ba komunidade iha aldeia Suli-ua, ne’ebé hela besik iha área tasi tamba konsidera nu’udar fatin turizmu.
“Ami sente importante atu implementa programa iha ne’ebá tanba iha tasi hanesan área turizmu tanba ita hakarak kria kondisaun tanba bainhira estrada komesa hadi’a, entaun ita iha ona kondisaun atu inan-aman sira aproveita halo buat ruma atu atrai vizitante iha fatin turizmu,” nia akresenta.
Notísia relevante: PAM Baucau enkoraja autoridade lokál aproveita PNDS rekupera ekonomia
Progresu projeitu bee-mos atinje ona 60% tamba konservasaun ramata ona no hein kanaliza ba área definidu, fatin kuru bee finaliza ona hamutuk 14 no daudaun hela ualu mak seidauk konklui.
Kona-ba estrada rasik iha suku Buruma, tuir autoridade suku ne’e, normalmente di’ak maski balun hetan estragu kauza hosi rai halai.
“Populasaun 80% mak hela besik estrada, entaun ladún hetan difikuldade atu transporta produtu ba merkadu,” nia hatutan.
Enkuantu, komunidade hamutuk 90% mak asesu eletrisidade, maski kondisaun rin eletrisidade seidauk favorável tamba sei uza ai, 10% mak seidauk asesu eletrisidade tamba simu tutan fali hosi uma seluk ka viziñu.
Totál fundu PNDS ne’ebé prevee ba bee-mos sistema gravitasaun iha aldeia Suli-Ua, suco Buruma hamutuk $49.250,20.
Suku Buruma rasik hamutuk aldeia hanesan aldeia Tasi, Casmuto, Ono-sere no Soli-ua, ho totál populasaun hamutuk 3.639.
Jornalista : Natalino Belo
Editora : Julia Chatarina
