BAUCAU, 11 jullu 2021 (TATOLI)—Primeiru Ministru (PM) no Ministru Interior, Taur Matan Ruak, Embaixadór EUA iha Timor-Leste, Kevin Blackstone, Xefe Estadu Maiór Jenerál F-FDTL, Tenente Jenerál Lere Anan Timur, lansa fatuk dahuluk reabilisaun konjunta Aeródromu, iha Baucau villa, munisípiu Baucau, hafoin halo diskusaun iha tinan naruk nia laran.
“Diskusaun dahuluk akontese iha tinan 2008, bainhira ha’u sai ona Jenerál ba Prezidente Repúblika no ikus mai sai Primeiru-Ministru, agora foin mak akontese. Entaun ha’u orgullu loos no finalmente ha’u partisipa iha lansamentu primeira pedra,” PM hateten iha Aeroportu Lanud Baucau, segunda ne’e.
Nune’e, Xefe Governu apresia no agradese ba disponibilidade EUA hodi bele realiza akordu konstrusaun konjunta entre parte rua.
Notísia relevante: Timor-Leste no EUA asina nota entendimentu ba kestaun rua
Diskusaun hahú bainhira komandante pasífiku hamutuk ho PM (momentu hanesan Jenerál) deskute hodi husu apoia levantamentu forsa aérea Timór, ne’ebé antes ne’e FALINTIL-Forsa Defeza Timor-Leste (F-FDTL) haruka membru na’in-10 ba hasai kursu iha Filipina iha área pilotu, engeñeria, tékniku, no eléktriku.
“Sira lubun tuir kursu maibé hafoin hasai tiha kursu no ramata tia lahalo buat ida iha tinan barak,” nia haktuir.
Tuir Xefe Ezekutivu, ho envolvementu EUA nia forsa armada aérea, Timór iha futuru di’ak no biban ne’e hato’o parabésn ba Tenente Jenerál Lere Anan Timur tanba F-FDTL iha ona kompenente aérea.
“Kuandu iha forsa aérea entaun presiza iha aeroportu ida, entaun iha tempu governasaun eis Primeiru-Ministru Xanana Gusmão, hatudu aeroportu ida-ne’e no halo negosiasaun hotu hodi avolta roda aeroportu Baucau,” Taur esplika.
Seremónia ne’e partisipa mós hosi Ministru Transporte no komunikasaun, José Agostinho da Silva, Vise-Ministru Interiór, António Armindo, Vise-Ministru Negósoiu Estranjeiru no Kooperasaun, Julio da Silva, inklui Autoridade munisipál, postu no suku Baucau.
Antes ne’e, Governu reprezenta hosi Vise Primeiru-Ministru no Ministru planu no ordenamentu, José Maria dos Reis no EUA reprezenta hosi Embaixador Kevin Blackstone, asina nota entendimentu atu halo reabilitasaun konjunta ba Aeródromu Baucau inklui apoia pontensiál ba aviasaun sivíl iha loron 28 juñu.
Objetivu hosi akordu ne’e atu ajuda dezenvolve programa promove dezenvolvementu ekonomia no deversifika área aviasaun sivíl ne’ebé sei finansia hosi Ministériu Defeza no EUA, ho alokasaun orsamentu hamutuk millaun $10,6.
Jornalista : Natalino Belo
Editora : Julia Chatarina
