DILI, 14 jullu 2021 (TATOLI)–Ministru Turizmu, Komérsiu no Indústria (MTKI), José Lucas do Carmo da Silva, aprezenta proposta projetu altesaun Dekretu-Lei númeru 10/2018, loron 09 abríl iha reuniaun Konsellu Ministru (KM) kona-ba Estatutu institutu ba Kualidade Timor-Leste, Institutu Públiku (IQTL, I.P, sigla portugés), ne’ebé hetan ona aprovasaun.
“Alterasaun ne’e hakarak atu armoniza kategoria membru órgaun IQTL ba kargu sira ne’ebé ekiparadu ho sira,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu iha Palásiu Governu, kuarta ne’e.
Notísia relevante: Rosito de Sousa nomeadu hanesan vogál konsellu administrasaun IQTL,I.P
Alterasaun ne’e mai ho objetivu ida atu hadi’a liután funsionamentu institutu públiku ne’e.
Proposta ne’e altera mós kompozisaun órgaun no rekizitu vinkulasaun IQTL, haluan númeru membru no konkretiza kompeténsia sira ne’ebé atribui ona ba kada órgaun instituisaun ne’e.
IQTL hanesan institutu atu halo kontrolu ba produtu importasaun no produtu ne’ebé prodúz iha rai-laran liuhosi análiza laboratóriu.
Jornalista : Antónia Gusmão
Editora : Julia Chatarina
