OÉ-CUSSE, 14 Jullu 2021 (TATOLI)—Organizasaun Naun Guvernamentál (ONG) Binibu Faef Nome (Bifano) apoia fasilidade dapur no sasán ijiene ba uma kain 250 iha suku (5) ne’ebé parténsia ba sub-rejiaun Pante Makasar no Pasabe.
ONG Bifano fasilita vítima ne’ebé hetan dezastre naturál tanba hetan apoia fundu hosi ONG internasionál OXFAM kona-ba fasilidade ‘Kitchen Kids no Higiene Kids’ ba vítima dezastre naturál no siklone tropikál seroja ne’ebé akontese iha loron 4 abríl liubá.
“Fundu ne’e hosi OXFAM liuhosi programa Australia umantária partnership atu responde vítima ne’ebé sai afetadu iha dezastre naturál iha RAEOA,” Diretor ONG Bifano, Jacinto Maia, informa ba Agência TATOLI liuhosi telefónika, kuarta ne’e.
Apoiu ne’e entrega ba komunidade suku (5) ne’ebé kompostu Suku Cunha, Lalisuk, Bobokase, Malelat no suku Abani, ho totál vítima uma kain 250 ne’e foka liu ba ema ne’ebé hetan dezastre naturál no familia kbiit laek sira, defisiensia no terseira idade.
Diretor ONG Bifano ne’e informa, pakote dahuluk hosi sasán mak hanesan fasilidade dapur nian; tudik modo, tudik meja, kanuru, garfu, bikan, kaneka, tasu no sanan.
Pakote segundu mak ijiene nian; balde ho torneira uza ba fase liman, balde ba kuru bee, jerigen, tolla, softex, sabaun fase-liman no fase-ropua, lilin, pastadente, eskova nehan, fatin lixu, lampda, sasuit alfaiate, eskova hamoos-liman no arame kose-sanan nian.
Atividade seluk, nia dehan, aumenta rede rekooperasaun atu kombate dezastre naturál ne’ebé durante ne’e akontese ona, ho nune’e Bifano prepara ona polítika no estratejia atu tulun komunidade sira hodi prevene-an.
Entretantu Prezidente Autoridade Espesiál Oé-Cusse-Ambeno (RAEOA), Arsénio Paixão Bano, husu ba benefisiáriu sira atu uza fasilidade hirak-ne’e ba interese nesesidade uma laran nian no labele fa’an tula fali bae ma seluk.
“Apoiu ne’e maihosi Ne’e no ONG Bifano fasilta ba benefisiáriu sira. Oé-Cusse ne’e tenke halo servisu no labele dependente ba nasionál. Oé-Cusse tenke rezolve rasik nia problema,” Arsénio Bano hateten.
Iha pasrte seluk, Koordenadór OXFAM, Milena Lam Mendonça, hateten OXFAM liuhosi serbisu hamutuk ho Guvernu Austrália implementa programa ne’’e ho nia objetivu atu ajuda komunidade sira-ne’ebé afetadu ka vítima dezastre siklone tropikál seroja.
Nia dehan, apoia umanitária ne’e sei hala’o durante fulan hitu (7), ne’ebé hahú iha fulan-jullu no sei konklui iha janeiru 2022.
“Iha ne’e, ita halo koordenasaun no identifikasaun ba uma kain iha suku lima (5) nia laran no iha aldeia 12. Programa ne’e foku liu ba komunidade ne’ebé vulneravél hanesan vítima dezastre naturál, ema ne’ebé moris ho defisiénsia no terseira idade,” nia dehan.
Jornalista : Abilio Elo Nini
Editór : Cancio Ximenes
