DILI, 22 jullu 2021 (TATOLI)—Serbisu Autónomu Medikamentu no Ekipamentu Saúde (SAMES) durante ne’e kontrata kompañia rua hodi fornese oksijéniu, ba fasilidade saúde no izolamentu-sira.
“Ita foti ona asaun konkreta no asegura kontratu ho kompañia fornesedór oksijéniu rua iha rai laran. Ita halo kontratu ba kompañia Carlo Dame durante tinan rua ba fornesimentu oksijéniu, no kompañia Daico kontrata tinan ida ba kuantidade oksijéniu,’’ Diretór Interinu SAMES, Francisco Borges hateten ba jornalista-sira iha Kampung Alor, kinta ne’e.
Notísia relevante:Austrália oferese silindru oksijéniu 84 ba SAMES
SAMES mós hanoin hela alternativu seluk katak, bainhira mosu senáriu ne’ebé aat liu no kazu aumenta, oinsá mak bele hetan oksijéniu, nune’e diskusaun ho parseiru sira kontinua la’o.
Parte Ministériu Saúde mós informadu atu aumenta tan mákina medical oxygen concentrator atu bele prodús oksijéniu rasik, bainhira liga direta ba eletrisidade.
Antes ne’e, SAMES iha ona mákina produsaun oksijéniu hamutuk 70 no halo ona distribuisaun iha fasilidade saúde no izolamentu-sira.
Jornalista : Felicidade Ximenes
Editór : Cipriano Colo
