DILI, 27 jullu 2021 (TATOLI)—Ministériu Justisa (MJ), halo ona prosesu aprovizionamentu hodi selesiona kompañia lokál ida, atu bele fornese blanko ba produsaun sertidaun Repúblika Demokrátika Timor-Leste (RDTL), sertidaun kazamentu, Guia de óbito ho bulletin rejistu kriminál.
“Parte Ministériu halo ona prosesu aprovizionamentu no daudaun-ne’e iha ona kontratasaun ho kompañia lokál ida atu fornese. Semana ne’e kompañia sei simu órden hodi prodúz blanku,” Diretór Diresaun Nasionál Jerál Serbisu Rejistu Notariadu (DNJSRN), Crisogno da Costa hateten ba jornalista Agéncia Tatoli, tersa ne’e.
Notísia relevante:DNJSRN submete ona pedidu manutensaun ba mákina fargo iha munisípiu haat
Crisogno da Costa, hateten daudaun-ne’e estoke blanko iha armajén nasionál laiha ona, tanba akizasaun halo kedan iha 2019.
Tanba ne’e, oras ne’e daudaun munisípiu Baucau, Ermera no Bobonaro halo atendimentu públiku ho emisaun provizóriu de’it.
Kona-bá munisípiu Dili iha de’it ezemplár 100 ne’ebé bele atende ba kliente durante semana ida bele hotu.
Tuir dadus hosi DNJSRN, hahú hosi janeiru to’o marsu tinan ne’e, serbisu notariadu emite ona sertidaun moris ba sidadaun hamutuk 3.949, sertidaun kazamentu 107 no óbitu 264.
Hosi fulan janeiru to’o juñu, emite mós billete identidade hamutuk 19.986 no rejistu kriminál 8.955.
Jornalista: Nelson de Sousa
Editór: Cipriano Colo
