DILI, 06 agostu 2021 (TATOLI)—Sentru Formasaun Jurídika no Judisiária (SFJJ), sei fó teste eskrita ba kandidatu formasaun juiz hamutuk na’in 210, iha segunda (09/08).
“Ita publika ona naran kandidatu-sira iha Jornál Repúblika ne’ebé pasa iha selesaun dokumentu hodi tuir teste eskrita,” Diretór SFJJ, Antóninho Gonçalves, hateten ba jornalista Agência Tatoli, sesta ne’e.
Notísia relevante:SFJJ ajusta matéria foun ba formasaun autór judisiál
Bainhira kandidatu-sira pasa iha teste eskrita, sei tuir tán ba faze teste orál no psikolójiku, hodi bele tuir formasaun atu sai juiz.
Diretór ne’e hatutan, prosesu hotu-hotu sei rigorozu atu selesiona kandidatu ne’ebé valór di’ak ba tuir formasaun.
SFJJ mós termina ona inskrisaun ba vaga formasaun atu sai prokuradór iha 04 agostu, ne’ebé rejista aplikante 265 maka konkorre no ekipa jurí sei verifika dokumentu, bainhira prienxe sei anunsia tuir prova.
Kona-bá vaga kandidatu ba defensór, iha ona aplikamente 227 mak hatama dokumentu no prazu rejistasaun sei taka iha 18 agostu.
Jornalista: Nelson de Sousa
Editór: Cipriano Colo
