iklan

OPINIAUN

Profesór Timorense nia pozisaun iha komplexidade problema edukasaun Timor-Leste

Profesór Timorense nia pozisaun iha komplexidade problema edukasaun Timor-Leste

Memensio Sequeira Freitas.

Hosi:

Memensio Sequeira Freitas

Diskusaun públiku barak kona-ba problema edukasaun iha Timor-Leste sempre envolve ka hatama mós profesór sira nu’udar elementu ida ne’ebé kontribui ba problema hirak ne’e. Iha opiniaun jeneralizadu balu dehan katak tanba profesór sira la iha domíniu ba língua ensina mak hamosu problema, balu fali dehan profesór sira la domina matéria ne’ebé sira hanorin no opiniaun negativa barbarak tan ne’ebé públiku timoroan sira lansa hanesan ideia síniku ida atu dezafia profesór sira, mellora sira-nia empeñamentu lorloron nian.

Artigu simples ida ne’e mosu atu aprezenta ideia simples balu kona-ba pozisaun profesór sira nian iha komplexidade hosi probelema edukasaun iha ita-nia rain durante besik dékada rua ne’e nia laran. Kestaun ne’ebé ha’u bele koloka mak será ke profesór sai parte ba problema ka sai parte ba solusaun iha komplexidade problema ida ne’e?

Iha Planu Estratéjiku Dezenvolvimentu Nasionál (PEDN) ba setór Edukasaun nian iha ninia pájina 40, sita mós problema balu kona-ba profesór, liu-liu kona-ba kualifikasaun akadémika hanesan sita tuir mai: A maior parte dos professores não tinha estas habilitações. Não se conhece a extensão deste problema na totalidade, estando a ser realizado trabalho no sentido de o resolver. Existem indicações de que a maior parte dos professores precisa de atualizar as suas qualificações. Proporcionalmente, existem mais professoras não qualificadas do que professores, o que se trata de uma questão de igualdade de género. Hela de’it ona tinan hira tan atu planu 2011-2030 ne’e termina mas ita seidauk hatene se iha ona mudansa no melloramentu preokupasaun ida ne’e ka lae?

Sé loos mak profesór ne’e lerek?

Iha disionáriu dalen tetun (2005, 688) difine profesór nu’udar matenek na’in ne’ebé hanorin ema iha eskola ka universidade sira. Tuir Dicionário Priberam da Língua Protuguesa, liafuan professor iha ninia sentidu nu’udar aquele que ensina uma arte, uma actividade, uma ciência, uma língua, etc.; aquele que transmite conhecimentos ou ensinamentos a outrem.  Profesór mak ema ne’ebé iha matenek no abilidade atu hanorin iha sala de aula ho tékniku no métodu hanorin nian ne’ebé adekuadu no iha mós kapasidade domina matéria ne’ebé nia hanorin ho língua ensina ne’ebé aplikável.

Heri Susanto (2020, 10) fó ninia difinisaun katak guru ialah orang yang merencanakan, dan melaksanakan proses pembelajaran, menilai serta membimbing peserta didik untuk meraih cita-cita dan memiliki budi pekerti. Professor sira la’ós de’it tranzmite siénsia ba ninia estudante sira maibé orienta mós estudante sira atu alkansa dezeju ne’ebé sira iha no liu-liu sai ema matenek ne’ebé iha personajen di’ak no delikadu. Tanba ne’e mak profesór hola papél importante lubuk ida hanesan hanorin, eduka, orienta, treina no sai mata-dalan ba estudante sira atu bele aprende valór sira ne’ebé di’ak, nune’e sira bele sai tebes ema ne’ebé iha kapasidade, abilidade no iha valór morál.

Nu’udar profisaun kmook ida, profesór bele determina futuru nasaun ida nian. Más para bele halo ida ne’e, profesór presiza domina matéria ne’ebe nia hanorin, hatene estratejia ensinu, bele enkoraja estudante sira atu estuda hodi hetan prestasaun ne’ebé di’ak no ho nune’e de’it mak bele atinje kualidade ensina ida ne’ebé másima, no liu-liu iha kódigu étika ne’ebé tuir duni ninia área profisaun nian. Karik profesór bele hola papél ida ne’e mak bele dehan profesór refere iha kapasidade profisionalizmu ne’ebé inkestionável.

Heru Susanto haklaken katak guru yang profesional minimal memiliki komitmen kepada peserta didik dan proses belajarnya, menguasai secara mendalam bahan pelajaran yang akan diajarkannya, serta cara penyampaiannya kepada siswa, bertanggung jawab memantau hasil belajar siswa melalui berbagai teknik evaluasi, mampu berpikir secara sistematis tentang apa yang dilakukan, mengadakan refleksi dan koreksi, belajar dari pengalaman dan memperhitungkan dampaknya pada proses belajar mengajar, dan seyogyanya merupakan bagian dari masyarakat belajar dalam lingkungan profesinya, sehingga menjadi interaksi yang luas dan profesional.

Kona-ba papél profesór nian, Esteves no Rodrigues (1993, 21) esklarese katak o professor ser o especialista de uma dada matéria curricular, ser especialista do ensino/aprendizagem de um dado conteúdo, mas “hoje ele não detém o monopólio do saber e novos papéis [que] se quer que ele desempenhe” e sobre ele pendem atribuição de novas funções, como vimos. Atualmente as mudanças sociais têm acontecido rapidamente, o professor tem vivenciado essas mudanças, que exigem reformas sistémicas para que o ensino praticado se mantenha consciente e de qualidade. As exigências aos professores direcionam-se no sentido de gerarem conhecimentos necessários ao aluno de modo a que, perante os problemas do dia-a-dia, na escola e na sociedade, este saiba agir eficazmente, com perspicácia, para se tornar autónomo. Deste modo, pode-se assim identificar uma diversidade de papéis que se atribuem ao professor, as suas tarefas não se confinam apenas ao domínio cognitivo.

Ba ida ne’e, tuir evolusaun edukasaun mundu ohin loron nian, profesór la’ós ona sai sentru ba edukasaun. Profesór sira sai de’it ona fasilitadór iha sala de aula, estudante sira mak tenke ativa liu atu bele aprende no aprofunda sira nia kapasidade intelijénsia relasiona ho matéria sira ne’ebé sira aprende iha sira nia estudu. Profesór sira mós presiza domina métodu ensinu nian, liu-liu oinsá mak sira envolve estudante sira iha sira-nia aula atu sai ativa liu tan. Mundu edukasaun ohin loron ezije estudante sira mak tenke sai sentru no ativu liu iha aula laran. Tanba ida ne’e duni mak profesór sira nia papél iha sala de aula la limita de’it ba domíniu kognitivu maibé tenke iha mós domíniu ba aspetu afetivu no psikomotóriku (Setyawan: 2014, 4).

Komplexidade problema edukasaun iha Timor-Leste no pozisaun profesór sira nian

Ko’alia kona-ba edukasaun nia problema ne’e kompleksu tebes. Buat lubuk ida mak ita seidauk konsege rezolve atu atinje objetivu fundamentál hosi edukasaun ne’ebé hatuur iha artigu 5 Lei Baze Edukasaun nian. Komplexidade problema edukasaun ne’e inklui infraestrutura bázika ne’ebé seidauk to’o ba eskola sira hotu-hotu, seidauk iha fasilidade laboratóriu no biblioteka adekuada iha eskola sira (liu-liu eskola públika sira), falta livru nesesáriu sira iha eskola sira, eskola barak falta profesór (tantu kuantitativamente komu proporsionalmente) no ensinu báziku sentrál balu kuaze la iha profesór destinadu ba siklu datoluk. Iha parte seluk, falta konxiénsia hosi komunidade atu kuída lisuk fasilidade sira iha eskola inklui konxiénsia alunu nian atu uza ho kuidadu fasilidade sira sai mós problema edukasaun nian. Aleinde ne’e, envelope fiskál hosi Orsamentu Jerál Estadu ne’ebé ki’ik tebtebes ba setór edukasaun enkuantu nu’udar programa prioridade ida no problema barbarak tan ne’ebé ita labele temi hotu bainhira ko’alia kona-ba edukasuan nia problema.

Ita-nia Lei Baze Edukasaun moderna tebes no Planu Estratéjiku Dezenvolvimentu Nasionál (PEDN) ba edukasaun mós di’ak tebtebes. Maibé, karik tanba la iha vontade polítika ne’ebé di’ak ou tanba sistema ne’ebé ita adapta iha ita-nia sistema edukativu mak la dun ajuda ka tanba fatór seluk tan mak la favorese atu ita bele alkansa metas sira iha PEDN laran mós ita la hatene. Más na realidade, edukasaun Timor-Leste nian enfrenta duni problema lubuk ida no presiza kontribuisaun hosi parte hotu-hotu nu’udar aktu sense of belonging (Pe. Mateus Afonso). Ne’e katak, atu rezolve problema edukasaun nian, la’ós de’it problema Ministériu Edukasaun, Juventude no Desportu nian mesak, embora polítika kona-ba edukasaun ne’e responsabilidade Governu nian.

Ho komplexidade problema ida ne’e, oinsá pozisaun hosi profesór sira nian? Profesór sira sai ajente ida kontribui ba problema ka ou entaun sira kontribui ba solusaun ruma? Para ita bele tetu didi’ak kestaun sira ne’e, tuir mai hakerek na’in hakarak aprezenta problema tolu (3) hosi problema barbarak ne’ebé profesór sira enfrenta hela durante ne’e, iha sira nia empeñamentu ba funsaun ne’ebé sira halo lorloron. Problema sira ne’e mak hanesan:

Profesór ho sira-nia prosperiedade

Kompara ho profesór sira hosi Sudeste Aziátika, profesór timorense nia saláriu mak ki’ik liu. Tabela salariál ne’ebé ita-nia Estadu hatuur ba profesór sira la sufisiente ba profesór sira atu bele sustenta sira nia moris lorloron. Tuir artigu 80 hosi Decreto Lei no. 23/2010 de 9 de dezembro iha ninia anexu II, define saláriu aas liu ba profesór mak US$ 400.00 no saláriu ida ne’e sei la iha mudansa to’o nia mate. Anaunser profesór refere sa’e ba kareira profesór seniór mak foin bele iha direitu ba saláriu másimu US$ 600.00 to’o nia mate no sei la iha tan mudansa ruma.

Dekretu refere mós la difini kona-ba direitu ba suplementu tuir artigu 67 hosi Lei n.o 5/2009, de 15 de julho (Lei Funsaun Públika) hatuur bainhira profesór ida halo trabalho em regime de turnos ka trabalho extraordinário ruma. De faktu, profesór barak ezerse funsaun liu oras 24 tuir artigu ne’e difini, maibé profesór hirak ne’e la hetan direitu uitoan ba serbisu ekstra sira ne’e, até iha eskola balu, profesór sira hanorin to’o oras 30 resin. Nível salariál ida ne’e la garante prosperiedade ka kesejahteraan profesór sira nian, no tanba ne’e, profesór barak mós tenke ba halo servisu sampingan seluk atu bele sustenta sira nia nesesidade família nian.

Tuir Isjoni (2000) aprezenta katak nível prosperiedade profesór ida nian bele haree hosi indikadór sira hanesan rendimentu mensál ne’ebé bele responde nesesidade bázika família nian permanentemente ho kualidade, nesesidade edukasaun familiár bele responde ho di’ak no ótimu, iha kapasidade atu eleva formasaun kontínua ba ninia kareira profisionál no iha kapasidade atu dezenvolve komunikasaun ba parte hotu-hotu tantu liu hosi utilizasaun teknolojia komu kenvensionalmente. Se ita kompara indikadór sira ne’e ba realidade moris profesór timoroan sira nian mak talvés la iha profesór ida iha Timór mak atinje ona indikadór hirak iha leten. Karik mós iha, ninia kuantidade mós kala sei ki’ik tebtebes. Hein katak iha ema ruma ka insituisaun ruma bele halo sondajen ka peskiza ruma kona-ba asuntu ida ne’e atu tetu nível prosperiedade profesór sira nian bazeia ba tabela salariál ne’ebé vigora ba profesór sira.

Saláriu ne’ebé ki’ik no falta de konsiderasaun ba prestasaun balun ne’ebé profesór sira atinje liu hosi formasaun sira, deskonsiderasaun ba sertifikadu formasaun sira ne’ebé presór sira hetan hodi aumenta sira-nia saláriu ka insentivu ruma bainhira sira halo servisu ekstra ruma, profesór sira sempre buka ezerse sira-sira nia funsaun. Sira hala’o sira nia servisu iha sira-nia falta nia laran no nunka dala ida halo boikota ba atividade ensinu aprendizajen iha eskola sira. Sira buka kumpre sira nia knaar tuir kalendáriu edukasaun nian no tanba ne’e nunka iha kanselamentu ba ezame sira ne’ebé MEJD hatuur ona iha programa sira.

Profesór ho lian-hanorin

Iha jeneralizasaun ba profesór sira katak profesór sira iha Timor-Leste la konsege domina lian-hanorin nian, katak língua portuguesa iha sira-nia prosesu ensinu no aprendizajen lorloron tuir artigu 14 hosi Decreto Lei no. 23/2010 de 9 de dezembro hatuur. A final da contas, to’o ohin loron, Ministériu Edukasaun, Juventude no Desportu (MEJD) rasik mós la iha dadus kona-ba profesór hira mak iha domíniu di’ak ba língua ensina no hirak mak la iha duni domíniu. Ida ne’e mosu, tanba dezde implementasaun hanorin ho lian-portugés hosi tinan 2009 mai, MEJD rasik mós nunka halo observasaun iha sala de aula ka avaliasaun ruma hodi hatene pursentu hira hosi profesór sira mak konsege no pursentu hira mak la konsege.

Iha alineia c hosi artigu 14 Decreto Lei no 23/2010 de 9 de dezembro kona-ba domínio das línguas oficiais hateten katak deter o domínio proficiente do língua portuguesa enquanto língua principal de instrução e de aquisição da ciência e da conhecimento, designadamente através do uso de linguagem técnica e de diferentes recursos estilísticos, para melhor compreensão dos alunos. Alineia ida ne’e nu’udar kritériu ida ne’ebé presiza atu hetan avaliasaun no promosaun ba iha domíniu ba língua ofisiál ka língua ensinu pesoa profesór sira nian mas até a data avaliasaun no promosaun ida mós la mosu enkuantu profesór sira hotu hetan de’it konsiderasaun la domina língua portugés nu’udar lian hanorin ida.

Aleinde ne’e, estudante sira (kuaze maioria) susar tebtebes atu tuir aula ho dalen portugés. Esperiénsia ba hatudu, alunu sira prefere liu atu prosesu ensinu aprendizajen la’o ho lian-tetun envezde portugés. Ida ne’e mosu tanba estudante sira la iha domíniu ba portugés. Iha buat rua mak sai kauza ba problema ida ne’e. Ida, tanba MEJD iha momentu balu ba kotuk implementa hanorin alunu sira hosi siklu dahuluk no daruak ho lian-materna ke hamate tiha labarik sira nia kapasidade ba domíniu lian-portugés. Ida seluk fali mak estudante sira tantu iha uma komu iha eskola opta liu atu ko’alia lian-materna ba malu envezde konversa ho dalen portugés. Ho realidade sira hanesan ne’e, profesór sira tenke kebra kabesa atu halo uluk interpretasaun matéria hosi dalen portugés ba dalen tetun hafoin tranzmite ba alunu sira, katak profesór sira sai interpretadór língua no tranzmitór matéria dala ida iha tempu ne’ebé hanesan. Sé profesór sira estilus hanorin de’it ho língua portuguesa mak estudante sira sei la bele inteira matéria ho di’ak.

Profesór ho livru

Durante besik dékada ida ona hosi implementasaun kurríkulu difinitivu ida ne’e, profesór sira mate moris ho de’it manuál úniku ne’ebé emite hosi MEJD ho kooperasaun ho Universidade Aveiro. Durante ne’e, la iha livru komplementár ruma, livru suporta ruma ka livru referénsia seluk ne’ebé MEJD emite ka autoriza tan atu bele komplementa profesór sira nia referénsia. Iha nasaun seluk, kada tinan tolu (3) dala ida, sempre iha livru komplementár no livru apoiu atu bele suporta kurríkulu implementada.

Kona-ba utilizasaun rekursu seluk ka manuál ou livru komplementár iha eskola, Castoldi no Polisarski (2009, 685) explika katak […] com a utilização de recursos didático-pedagógicos (manuál complementar), pensase em preencher as lacunas que o manuál oficial geralmente deixa, e com isso, além de expor o conteúdo de uma forma diferenciada, fazer dos alunos participantes do processo de aprendizagem. Tais recursos favorecem o desenvolvimento da aprendizagem dos alunos, pois propiciam meios de motivá-los e envolvê-los ao conteúdo que está sendo discutido, proporcionando, assim, uma melhor compreensão e interpretação do que está sendo trabalhado.

Haree ba ideia ida ne’e, bele dehan katak livru komplementár no livru apoiu sira mós iha ninia papél importante atu ajuda mellora kualidade ensinu iha ita nia sistema edukativu. Kabe ba MEJD atu halo polítika akizisaun ba livru ka manuál komplementár sira atu bele kompleta tan manuál ofisiál ne’ebé ninia utilizasaun kuaze dékada ida ona ne’e. Embora ita moris ona iha plataforma dijitál ho teknolojia internet ne’ebé moderna tebes, maibé prezensa manuál ka livru sira sei importante tanba la’ós profesór hotu-hotu bele asesu ba internet no la’ós konteúdu hotu-hotu ne’ebé publika iha internet ne’e kredível.

Apezar problema 3 hosi problema barbarak ne’ebé profesór sira enfrenta durante ne’e, profesór sira nunka husik ka abandona sira-nia tarefa iha sala de aula atu bele fasilita estudante sira ho meius oioin ne’ebé sira iha. Profesór sira sempre empeña sira nia funsaun no kumpre nafatin kalendáriu akadémiku ne’ebé MEJD fó sai no ezame periódika no ezame nasionál sira nunka falla ka kanseladu tanba dezeobediénsia profesór sira nian ba kalendáriu. Ho difikuldade tomak ne’ebé sira enfrenta, hanesan funsionáriu públiku ida no liu-liu tanba profesór ne’e profisaun kmook ida ne’ebé iha ninia vokasaun rasik, profesór sira sempre hatudu sira-nia prontidaun atu kontribui ba melloramentu ensinu iha ita nia rain, embora, iha profesór balu sente dezanimadu tanba fatór prosperiedade sira nia la garantidu.

Ho realidade ne’ebé profesór sira hatudu tiha ona durante tinan 19 ne’e nia laran, públiku timorense bele avalia rasik performa ita-nia profesór sira nia iha esforsu atu prodúz kapitál umanu ba prosesu dezenvolvimentu rai ida ne’e nia ba oin. Atu dehan katak problema edukasaun ne’e la’ós responsabilidade MEJD ka Governu nian mesak. Kestaun edukasaun ne’e responsabilidade koletivu, katak ema hotu-hotu iha devér atu halo susesu objetivu nasionál hosi ita-nia sistema edukativu nu’udar hatuur ona iha Lei Baze Edukasaun no nu’udar mós prova konkreta ba sense of belonging hosi timoroan sira hotu nian.

Hakerek na’in nu’udar manorin ida iha Eskola Sekundária Públika 12 de Novembru Dili no hela iha Manleuana Dili.

iklan
iklan

One Comment

  1. Belun…..!
    Kualker ema ida bele hateke ba-mai iha kualker pozisaun. Maibe la signifika katak nia hare saida mak nia hateke ba.
    Iha ne hamosu perguntas hanesan tuit mai ne:
    Tanbasa mak ema gosta liu hatudu liman ba ptofesor sira duke gogerno? Nusa mak la geste ona konaba fasilidade eskola mas kolia prefere fali ba professor sira?
    Tuir hau nia hare problema kualidade edukasaun laos deit depende ba professor maibe importante liu mak kria kondisaun/fasilidade eskola. Brigd e adeusssss.

Leave a Reply

iklan
error: Content is protected !!