DILI, 18 agostu 2021 (TATOLI)–Governu liuhosi reuniaun Konsellu Ministru (KM), iha kuarta ne’e, aprova projetu Rezolusaun Governu hodi mantein impozisaun serka sanitária iha rejiaun tolu iha Timor-Leste to’o fulan ne’e nia rohan.
Área ne’ebé tama impozisaun serka sanitária mak hanesan iha suku Naimeko, iha sub-rejiaun Pante Makasar no suku Bobometo iha sub-rejiaun Oesilo, iha Rejiaun Administrativa Espesiál Oé-cusse Ambeno (RAEOA), nune’e mós iha munisípiu Dili no iha postu administrativu Ermera no Railaco, munisípiu Ermera to’o tuku 23:59 loron 30 agostu.
Ezekutivu sira hola desizaun ne’e, hafoin analiza aprezentasaun hosi ekipa Sala Situasaun, Sentru Integradu Jestaun Krize (CIGC, sigla portugés) kona-ba pontu situasaun epidemiolójika nasionál.
“Área ne’ebé tama impozisaun serka sanitária iha Ermera, mantein mós konfinamentu domisiliáriu jerál ba populasaun to’o tuku 23:59 loron 25 agostu,” Ministru Prezidénsia Konsellu Ministru, Fidelis Manuel Leite Magalhães, hateten, hafoin ramata reuniaun ezekutivu iha Palásiu Governu.
Nune’e, kontinua bandu sirkulasaun ema entre área ka munisípiu sira ne’ebé impoin serka sanitária no sirkunskrisaun administrativa seluk, exetu iha kazu hirak ne’ebé ninia fundamentu forte tanba razaun seguransa públika, saúde públika, asisténsia umanitária, manutensaun ba sistema abastesimentu públiku ka razaun seluk ne’ebé presiza atu hala’o ba interese públiku.
Maski nune’e, proibisaun ne’e la inklui individuu ne’ebé kompleta ona vasina kontra COVID-19 inklui labarik sira ho idade neen mai kraik ne’ebé akompaña indivíduu sira-ne’e.
Jornalista : Antónia Gusmão
Editora : Julia Chatarina
