DILI, 25 agostu 2021 (TATOLI)–Governu liuhosi Ministériu Planu Ordenamentu (MPO) no Ministériu Administrasaun Estatál (MAE) konklui ona levantamentu fatin tolu ne’ebé tuir planu atu harii realojamentu temporária ba vítima inundasaun ne’ebé akontese iha loron 04 abríl.
Vise Primeiru-Ministru no Ministru Planu no Ordenamentu, José Maria dos Reis, hateten, fatin tolu ne’ebé tama planu mak hanesan Hera ektare 20, Beduku ektare neen no Tibar ektare neen.
“Ministériu Administrasaun Estatál halo hela prosesu tanba iha fatin tolu ne’ebé Ministériu Justisa fó ami halo levantamentu iha fatin tolu sei iha problema balun kona-ba rai, ne’ebé atu rezolve hafoin bele kontinua planu alojamentu ne’e,” Vise Primeiru-Ministru informa iha Palásiu Governu, kuarta ne’e.
Tuir nia, planu realojamentu temporáriu ne’e hodi fasilita komunidade ne’ebé hela sentru akollimentu no komunidade balun ne’ebé hela iha fatin risku dezastre naturál.
“Ita presiza rezolve fatin uluk hafoin tama ba planu harii realojamentu hodi vítima sira bele hela temporáriu,” nia akresenta.
Tuir dadus ikus, hatudu katak família afetadu inundasaun hamutuk 33.835 iha territóriu tomak, família hamutuk 7.246 mak desloka ba sentru akollimentu 31 no rejista ema mate hamutuk 44.
Dadus ikus hosi MAE, relata katak família hamutuk 2.558 maka daudaun hela iha área risku dezastre naturál iha munisípiu Dili, hanesan besik mota, foho-lolon no lagoa ninin.
Jornalista : Florêncio Miranda Ximenes
Editora : Julia Chatarina
