DILI, 03 setembru 2021 (TATOLI) – Estudante finalista 1.200 hosi Universidade da Paz (UNPAZ) realiza ona peskiza hodi prepara matéria ezame obra sientífiku hodi hakat ba judisium.
Reitór UNPAZ Adolmando Amaral, hateten ba Agência Tatoli katak, estudante finalista 1.200 agora daudaun hala’o hela peskiza iha terrenu durante fulan tolu, nune’e peskiza ne’e sei termina iha fulan outubru, tinan ne’e.
“Sira sei aprezenta rezultadu peskiza ba universidade depois maka universidade sei termina ezame ba sira bazeia ba obra sientífiku sira nian durante fulan tolu rekolla iha terrenu,” reitór Adolmando iha kampus UNPAZ, Dili, sesta ne’e.
Adolmando hateten judisium ba estudante sira bazeia ba preparasaun estudante sira nian durante fulan tolu iha terrenu. Maibé prosesu graduasaun bá estudante finalista sira termina ona iha fulan dezembru tuir kalendáriu akadémiku nian.
“Estudante 1.200 ne’e ita sei lori bá gradua iha tinan ida-ne’e tuir kalendáriu akadémiku nian graduasaun ne’e sei akontese iha 21 dezembru,” nia hateten.
Estudante 1.200 ne’e mai hosi fakuldade neen mak hanesan Fakuldade Ekonomia, Fakuldade Siénsia Humana, Fakuldade Saúde Públika, Fakuldade Enjeñaria, Fakuldade Direitu no Fakuldade Teknolojia Agríkola.
Jornalista : Tomé Amado
Editór : Francisco Simões