DILI, 16 setembru 2021 (TATOLI)—Primeiru-Ministru, Taur Matan Ruak, informa iha loron 22 setembru médiku ekipa espesialista hosi Austrália sei mai tan Timor-Leste fó asisténsia maka’as ba espesialista, profisionál sira iha sala izoolamentu Lahane no Vera Cruz.
“Ha’u mós informa ba Prezidente Repúblika kona-ba apoiu ne’ebé ita hetan hosi Austrália, médiku ekipa ida ema na’in-ualu (8), iha loron 22 setembru ne’e sira sei mai tan na’in-tolu (3) ne’ebé fó asisténsia maka’as ba ita nia espesialista, profisionál sira iha Lahane no Vera Cruz,” PM Taur Matan Ruak informa ba jornalista sira hafoin hala’o enkontru ho Xefe Estadu, Francisco Guterres Lú Olo, iha rezidénsia Faról, Dili, kinta ne’e.
Tanba, nia dehan, pesoál saúde sira kuaze tinan ida resin loron-kalan hadeer atu tau-matan ba ema moras sira ne’e susar la halimar, entaun Governu halo reforsu atu bele ajuda sira pelumenus sira iha tempu ba deskansa no mellora atendimentu ba sidadaun sira-ne’ebé afeta COVID-19 baixa iha Lahane no Vera Cruz.
Antes ne’e, Embaixadór Australia iha Timor-Leste, Peter Roberts hateten ekipa médiku espesialista emerjénsia hosi Australia ne’e mai hamutuk na’in-ualu (8) ne’ebé kompostu hosi feto haat (4) no mane haat (4) atu servisu hamutuk no suporta médiku timor-oan sira hodi responde ba kazu COVID-19.
Aliende ida-ne’e, Taur Matan Ruak informa ba Prezidente Repúblika Francisco Guterres Lú Olo katak situasaun pasajen ilegál iha fulan-agostu de’it ema 800 resin entaun Governu tau ba iha preokupasaun ida.
“Ha’u informa ba Prezidente Repúblika Francisco Guterres Lú Olo, kona-ba situasaun pasajen ilegal sira, hanesan ita-boot sira hatene, kuaze agostu de’it pasajen ilegál ne’e ema 800-resin, entaun ita preokupa la halimar,” PM informa.
Tanba ne’e, Governu buka dalan halo nusá mak sensebiliza timor-oan sira-ne’ebé karik ba sira tuir viajen legál, sira labele tuir viajen ilegál ne’e ladun di’ak ba Timor-Leste no ba viziñu Indonézia.
Entretantu, Polísia Nasionál Timor Leste (PNTL) konklui ona identifikasaun ba Timor-oan na’in 250 ne’ebé antes ne’e hetan deportasaun hosi autoridade Indonézia tanba hakat ilegal ba Atambua, nune’e faze tuir mai sei submete ba Ministériu Públiku.
Jornalista : Osória Marques
Editór : Cancio Ximenes
