DILI, 17 setembru 2021 (TATOLI)—Polísia Nasionál Timor-Leste (PNTL), konklui ona indentifikasaun ba Timoroan na’in 420, ne’ebé antes ne’e hetan deportasaun hosi autoridade Indonézia mai Timor-Leste, tanba hakat fronteira ho dalan ilegál, hodi submete na Ministériu Públiku (MP).
“Iha ema na’in 719 mak foin lalais hetan deportasaun no 420 mak termina ona investigasaun, enkamiña ba MP hodi loke prosesu tuir-mai,” Portavós Komandu Jerál PNTL, Superintendente Xefe, Arnaldo Araújo, hateten ba jornalista-sira iha Komandu Jerál, Caicoli, sesta ne’e.
Notísia relevante:Pasajen ilegál fronteira, ema na’in 250 sei submete ba MP
Sidadaun hirak-ne’e antes ne’e Serbisu Investigasaun Kriminál Nasionál (SIKN), halo investigasaun iha Dili, Baucau ho Bobonaro no sei kontinua loke prosesu ba sidadaun sira seluk tan ne’ebé sei iha hela kuarentena.
Bazeia ba lei imigrasaun no dekretu Governu númeru 19/2021, 1 jullu, kona-bá medida ezekusaun Estadu emerjénsia, efetua hosi dekretu Prezidente Repúblika númeru 39/2021, juñu ne’e iha artigu 7, obrigatóriu kontrola sanitária, iha alínea 4 hateten, indivíduo ne’ebé tama territóriu nasionál ho dalan ilegál, sei hetan koima ho valór minimu $30 no másimu $250, maibé tenke kumpre uluk kuarentena loron 14, hafoin investiga no aplika koima hosi serbisu imigrasaun.
Aliénde ne’e, kualkér sidadaun ne’ebé dezobediénsia ba regra, autoridade bele loke prosesu kriminál.
Jornalista: Nelson de Sousa
Editór: Cipriano Colo
