AILEU, 27 setembru 2021 (TATOLI)-–Ministériu Obra Públika (MOP) selebra aseitasaun ho empreza manan-na’in hamutuk 26 ba konkursu públiku projetu reabilitasaun rutina no períodika estrada rurál ba dezenvolvimentu iha munisípiu rua.
Tuir Ministru Obra Públika, Salvador Eugênio Soares dos Reis Pires, empreza sira ne’ebé kompete ba konkursu públiku ne’e lubuk ida, maibé liu selesaun no avaliasaun rigorozu hamutuk empreza 26, ne’ebé iha Aileu iha neen no Liquiçá iha 20.
“La kleur tan bele asina kontratu hodi mobiliza no hahú ezekuta projetu ne’e,” Ministru Salvador hateten iha salaun Komisaun Veteranu, Aileu, segunda ne’e.
Orsamentu ba projetu estrada rurál iha munisípiu rua hamutuk millaun $2-resin, ho reabilitasaun períodika no rutina ba estrada rurál kilómetru 65, ho durasaun serbisu tinan-ida, hahú hosi 2021 to’o 2022.
Iha tinan 2019, MOP kontrata ona enjeñeiru hamutuk 50 iha munisípiu sira atu hamutuk ho tékniku International Labour Organization (ILO) halo supervizaun diária hodi garante kualidade obra.
“Ha’u husu ba empreza manan-na’in sira, bainhira asina kontratu hodi ezekuta projetu tenke ho responsabilidade atu garante kualidade obra sira, nune’e iha sustentabilidade atu garante konetividade via terrestre hodi fasilita dezenvolvimentu ekonómiku,” nia akresenta.
Tinan ne’e, Governu Timor-Leste halo investimentu ba estrada rurál hamutuk millaun $14 resin ba projetu hamutuk 67 no hetan apoia hosi Governu Austrália atu fó asisténsia téknika liuhosi ILO ba formasaun, planeamentu, dezeñu no formasaun ba traballadór no setór privadu iha área jestaun projetu.
“Ita-nia orsamentu rasik ba programa estrada rurál, reabilitasaun no manutensaun, enkuantu Governu Austrália fó apoia asisténsia téknika iha faze planeamanetu no jestaun projetu sira,” nia hatutan.
Notísia relevante: Austrália apoia ona millaun AU$62 ba asisténsia téknika estrada rurál
Iha biban hanesan, Embaixadór Austrália iha Timor-Leste, Peter Roberts, apresia Governu Timor-Leste nia susesu ba implementasaun projetu estrada rurál ba dezenvolvimentu.
“Governu Austrália suporta asisténsia téknika ba projetu estrada rurál iha Timor-Leste ne’ebé susesu tanba komunidade rurál atu asesu ba servisu saúde, edukasaun no merkadu,” nia afirma.
Hahú tinan 2012, Austrália fó apoiu ona asisténsia téknika liuhosi ILO ba Governu Timor-Leste liuhosi MOP atubele suporta kampu traballu ba timor-oan liuhosi kontratu lokál no promove mós setór privadu atu garante kualidade obra sira ne’ebé Governu rasik investe.
Iha biban hanesan, Administradór munisípiu Aileu, Abel da Conceição, agradese ba Governu tanba munisípiu ne’e hetan investimentu maka’as ba projetu estrada rurál ba dezenvolviementu.
“Ha’u agradese no husu ba empreza manan-na’in sira atu halo obra ho responsabilidade hodi garante kualidade, povu bele asesu ba merkadu, servisu saúde no edukasaun,” nia apela.
Enkuantu, Diretora LNG Unip. Lda, Madalena Gabriela, dehan, ninia empreza hetan projetu ho distánsia kilómetru 14 hosi suku Manucassa ba suku Faturilau, postu administrativu Lequidoe, munisípiu Aileu ho kustu $411.620,44.
“Ami prontu atu implementa projetu ho kualidade tuir oráriu ne’ebé Ministériu Obra Públiku fó ona mai, hodi kontribui ba dezenvolvimentu Timor-Leste,” nia garante.
Jornalista : Florêncio Miranda Ximenes
Editora : Julia Chatarina
