COVALIMA, 30 setembru 2021 (TATOLI)—Responsável Maternidade, Juliana Bauc informa, hahú hosi fulan-agostu to’o setembru tinan ne’e, inan isin-rua hamutuk 26 mak partu iha Sentru Saúde Tilomar, suku Maudemo, munisípiu Covalima.
“Iha agostu no setembru, ami halo atendimentu hodi fó partu ba inan isin-rua hamutuk 26. Hosi númeru ne’e fulan-agostu na’in-14 no fulan-setembru 12,” Juliana Bauc relata dadus ne’e, bainhira deputadu sira hosi Komisaun F hosi parlamentu nasionál hala’o fiskalizaun iha sentru saúde Tilomar, kinta ne’e.
Nia hateten, parteira sira halo atendimentu bainhira inan isin-rua partu ho kazu hanesan tensaun aas (hipertensaun), sentru saúde ne’e halo transferénsia ba iha Óspital Referál Covalima.
Dezafiu ne’ebé parteira sira entrenta mak menus fasilidade hanesan laiha fatin atu hamanas bebé no oksijéniu.
Membru Komisaun F Parlamentu Nasionál, Deputada Lúcia Taeki, hateten pesoál saúde hala’o sira-nia kna’ar tuir profisaun hanesan parteira hala’o sira-nia servisu hodi fó partu ba inan isin-rua. Maibé realidade hatudu katak espasu iha sala maternidade ne’e ki’ik liu.
“Ami haree iha sentru saúde ida-ne’e menus fasilidade tuir programa ida-idak. Tanba, ita haree espasu iha sala maternidade ne’e ki’ik liu no iha kama rua de’it mak iha laran. Kondisaun sala maternidade iha sentru saúde ida-ne’e fó atendimentu de’it ba ema na’in rua (2) labele liu,” nia dehan.
Tanba ne’e, nia dehan, hosi rezulatdu fiskalizasaun ne’e Komisaun F iha Parlamentu Nasionál sei hato’o rekomendasaun ba Governu liu-liu minstériu relevante atu tau ba konsiderasaun.
“Ami sei fó rekomendasaun atu haluan tan sala maternidade ba sentru saúde ne’e, tanba iha ne’e totál populasuan mós barak,” nia hateten.
Parteira ne’ebè halo atendimentu ba inan-isin rua iha Sentru Saúde Tilomar, iha suku Maudemo, postu administrativu Tilomar, munisípiu Covalima.
Jornalista : Celestina Teles
Editór : Cancio Ximenes
