BAUCAU, 01 outubru 2021 (TATOLI)–Xefe suku Triloka, postu administrativu Baucau villa, munisípiu Baucau, Alexandre da Costa, informa, totál vítima mortál iha funu-laran hamutuk na’in-645 hosi uma-lisan hamutuk 44.
“Ami-nia pedidu hamutuk livru 51, maibé hafoin rekolla dadus iha de’it uma-lisan hamutuk 44 hosi aldeia haat suku Triloka, ne’ebé hosi rezultadu dadus, totál ema ne’ebé mate iha ai-laran no Villa-laran hosi tinan 1975 to’o 1979 no 1980 to’o 1999 hamutuk na’in-645,” líder komunitáriu ne’e hateten ba Agência TATOLI, iha Sentru Konvensaun Baucau (CCB, sigla portugés), sesta ne’e.
Notísia relevante: Suku Fatulia finaliza rekollimentu dadus uma-lisan no vítima mortál funu
Hosi númeru ne’e, iha kategoria rua hanesan vítima ne’ebé mate tanba hakarak ukun rasik-an hamutuk na’in-634 no sira ne’ebé hakarak integrasaun hamutuk na’in-11.
Prosesu rekollamentu dadus iha suku Triloka ho durasaun fulan-ida, hahú hosi inisíu fulan setembru to’o nia rohan.
“Komisaun fó tempu fulan-ida, maibé ami submete mai postu administrativu liu loron-rua,” Alexandre akresenta.
Triloka rasik sai hanesan sentru konsentrasaun klandestina no hanesan líder funu-na’in nia abrigu subar fatin durante luta hasoru okupasaun.
Atividade levantamentu dadus bazeia ba orientasaun hosi Sekretaria Estadu Kombatente no Libertasaun Nasionál (SEKLN), ho objetivu atu hatene dadus loloos hosi vítima mortál iha tinan 24 nia-laran durante okupasaun Indonézia.
Suku Triloka iha aldeia haat, kompostu hosi Aubaka, Baduho’o, Makasae no Lekiloiuatu, ho totál populasaun hamutuk na’in 2.723 hosi uma-kain 406.
Jornalista : Natalino Belo
Editora : Julia Chatarina
