DILI, 05 outubru 2021 (TATOLI)-Timor-Leste for Coalition (TLCE) husu ba profesór sira iha territóriu Timor-Leste atu kontinua kapasita aan nune’e bele kontribui ba kualidade edukasaun iha rai-laran.
Loron mundiál ba profesór sira (World Teacher Day), kada tinan mundu selebra iha 05 fulan-outubru bazeia ba rekomendasaun ILO/UNESCO iha tinan 1966 kona-ba estatutu profesór, no padraun kona-ba diretu no responsabilidade mestra no mestri sira-nian.
Selebrasaun loron mundiál ba profesór sira hahú kedas iha tinan 1994. No iha tinan 2021, selebrasaun ne’e ho tema “Teachers at the heart of education recovery”.
Koordenadór TLCE, José Monteiro, hateten ho komemorasaun loron mundiál ohin, profesór sira persiza halo reflesaun kle’an kona-ba kna’ar no responsabilidade sira durante ne’e, atu ne’e bele hasa’e kualidade edukasaun iha rai-laran.
“Atu hadi’a edukasaun no hadi’a kualidade joven sira-nia nian mak hadi’a uluk kualidade profesór nian tanba bainhira profesór matenek estudante mós matenek,” Koordenadór TLCE José Monteiro hateten ba Agência TATOLI iha nia knaar fatin, Caicoli, Dili tersa ne’e.
Governu liuhosi MEJD iha obrigasaun no responsabilidade atu fó formasaun ba profesór hahú kedas husi nível bázika to’o universidade liliu iha lian portugués atu nune’e bele aumenta abilidade manorin sira nian hodi transmite ba estudante sira iha prosesu aprendizajen lorloron.
“Ita hatene daudaun ne’e profesór balun iha saláriu di’ak balun ladún no balun sei voluntáriu hela, maibé hakarak atu dignfika ka hasa’e saláriu bele de’it maibé profesór sira mós tenke hasa’e uluk koñesementu, tanba bainhira koñesementu sa’e ona saláriu sira mós sa’e automátikamente tanba lei baze edukasaun hateten tiha ona,” nia dehan.
Nune’e mós sujere ba Governu liuhosi Ministériu Edukasaun Juventude no Desportu (MEJD) atu fó premiu ka setifikadu apresiasaun ba profesór sira ne’ebé maka hatudu prestasaun no dedikasaun di’ak.
“Kona-ba ba prestasaun, ita-nia profesór balun iha Timor-Leste hetan hanesan membru Sindikatu Profesór iha Baucau hetan prémiu Prinseza Tailándia iha tinan kotuk tanba sai profesór mellor, prestasaun iha rejionál kada tinan simu, maibé iha ne’e hosi rai seluk, la’os iha Timor-Leste,” nia hateten.
Jornalista : Arminda Fonseca
Editór : Agapito dos Santos
