DILI, 07 outubru 2021 (TATOLI) – Ekipa ho naran Kuda Ulun hosi munisípiu Bobonaro foin mak susesu tan iha nia jornada hodi hadau pontu tolu iha jornada 13 Pra Liga Futsal ne’ebé halao kinta kalan ne’e iha kampu futsal FALINTIL-Forsa Defeza Timor – Leste (F-FDTL) Fatuhada Dili.
Iha jornada jogu, bainhira hahú jogu iha novembru 2020 tinan kotuk to’o ohin loron Kuda Ulun foin mak manan dala rua iha nia istória jogu kompara ho ekipa sira seluk.
Tanba ne’e, bainhira rekolla pontu tolu hosi Kablaki Kuda Ulun sente hanesan orgullu ida ba sira hodi esforsu an maka’as iha jogu sira tuirmai atu nune’e bele hasa’e sira-nia pontu iha tabela klasifikasaun provizóriu.
Enkuantu, Kablaki mós iha nia jornada hahú novembru tinan kotuk to’o ohin loron foin manan dala ida iha nia istória jornada. Ho nune’e to’o ohin loron iha tabela klasifikasaun provizóriu ekipa ne’e foin mak rekolla pontu haat (4) tanba manan dala ida, empata dala ida no lakon dala 11 no Kuda Ulun manan dala tolu, empata ida (1) no lakon sia (9).
Hosi rezultadu ne’e halo ekipa rua ne’e iha jornada tuirmai tenke servisu maka’as atu rekolla pontu barak atu sai hosi zona mean ka zona degradasaun.
Bainhira ekipa rua nia jogu hahú iha minutu primeiru sira lansa kontra ho atake ba malu tuir saida mak sira iha liuhosi pasa bola hosi ain ba ain iha kampu laran hodi buka se los mak atu hatama uluk golu.
Kuda Ulun serbisu maka’as tebes bainhira minutu 20 primeiru ho alvu tenke manan, ikus manan duni. Bainhira iha minutu ualu jogadór Domingos Esteven lansa ona golu primeiru hodi muda eskore ba 1-0. Kuda Ulun seidauk kontente ho rezultadu ne’e hodi kontinua serbisu. Serbisu no serbisu. Hetan rezultadu.
Tanba ne’e, to’o iha minutu 12 serbisu hirak ne’e iha duni valór nune’e jogadór Armindo Amaral oferese tan golu ida ho sutu maka’as ba guarda-rede Kablaki halo Manuel Santos labele salva ikus golu duni rezultadu hatur kedan ba 2-0.
Hosi golu ne’e Kuda Ulun nia jogadór sira selebra maibé seidauk kontente tanba seidauk iha esperansa atu manan tanba Kablaki mós hatudu jogu ne’ebé di’ak maibé seidauk kona iha alvu.
Jogu lao to’o iha minutu 18 besik ona atu ba intervallu Armindo Amaral lansa tan golu ida hatuur kedan valór ba 3-0 halo Kablaki tenke serbisu liután tanba rezultadu golu komesa dook ba bebeik.
Bainhira to’o ona minutu 20 árbitru ne’ebé dirije hosi Helder Martins, primeiru, David da Costa segundu no rezerva Natalino Faria tenke hú apitu hodi termina jogu primeira parte atu jogadór sira bele deskansa minutu balun hafoin tama fali.
Jogu entre ekipa rua ne’e hanesan mós ho jogu primeiru entre ekipa Jerman no Baucau tanba la anima másimu hosi adeptu sira. Adeptu barak hamriik hale’u rede iha kampu ninin maibé nonok de’it. La hasee lian ruma to’o jogu ramata.
Haksoit ba segunda parte ekipa rua nafatin hatudu jogu. Kablaki mantein pozisaun ho dignidade maski lakon hatudu jogu ne’ebé bonitu. Nune’e iha minutu 25 jogadór Ricky Gonçalves halo mudansa duni rezultadu ba 3-1 liuhosi golu ne’ebé nia halo ho kalma bainhira bola barullu iha rede Kuda Ulun nia oin halo guarda-rede Kuda Ulun José Pereira la iha konsentrasaun ikus rezulta golu.
Hosi rezultadu ne’e halo Kuda Ulun mós fuan duk-dak atu serbisu maka’as tan atu bele hatama tan golu iha minutu ikus ne’e, nune’e iha minutu 31 jogadór Inácio Magno lansa tan golu ikus hodi hametin rezultadu ba 4-1 to’o jogu termina laiha tan golu ruma mak akontese tan ba ekipa rua no Kuda Ulun mak iha direitu absoluta ba hetan pontu tolu.
Jornalista: Hortencio Sanchez
Editór: Rafy Belo
