VIQUEQUE, 14 outubru 2021 (TATOLI)–Xefe suku Uaitame, postu adiministrativu Uatulari, munisípiu Viqueque, José do Rosario, informa, impaktu mudansa klímatika halo konstrusaun Uma Kibit Laek (UKL) foin mak atinje 25%.
“Mudanda klímatika difikulta transporte tama suku lori materiál kontrusaun, tanba ne’e ami-nia konstrusaun uma foin mak atinje 25%,”Líder komunitáriu ne’e hateten ba Agência TATOLI, iha suku Uaitame, kinta ne’e.
Servisu kontrusaun UKL ba uma tulu to’o ona pondasi no agora hada tan ona bataku sa’e.
“Ami sei akompaña serbisu ekipa hosi Programa Nasionál Dezenvolvimentu Suku (PNDS) no fiar katak tama fulan-novenbru bele atinje ona 70%,” nia akresenta.
Governu hahú lansa fatuk dahuluk UKL iha aldeia Nunulete, suku Maubaralisa, postu administrativu Maubara, munisípiu Liquiçá iha juñu 2021 no iha tempu tuir mai lansa iha munisípiu seluk iha territóriu tomak.
Notísia relevante: Governu hahú ona konstrui “Uma Kbiit Laek” 1.254 iha territóriu nasionál
“Iha fulan kotuk liubá udan hela de’it, dalan liga ba konstrusaun a’at no suku Uatame nian UKL monu iha aldeia Sana, ne’ebé dook hosi Villa no husi suku. Maibé agora di’ak ona, ne’ebé kareta bele lori ona materiál konstrusaun. Ohin loron udan para ekipa sei esforsu finaliza konstrusaun,” nia dehan.
Governu implementa UKL iha territóriu tomak hamutuk 1.254, kompostu hosi Aileu sei konstrui uma 99, Ainaro 62, Baucau 177, Bobonaro 150, Covalima 90, Dili 24 de’it tanba Postu Administrativu Ataúro ho Metinaro mak hetan Uma Kbiit Laek ne’e, Ermera 156, Lautém 102, Liquiça 69, Manatuto 93, Manufahi 86 no Munisípiu Viqueque hamutuk 108.
Jornalista : Vitorino Lopes da Costa
Editora : Julia Chatarina
