COVALIMA, 27 outubru 2021 (TATOLI)—Primeiru-Ministru, Taur Matan Ruak, antes hala’o lansamentu ba perfurasaun mina-matan iha rai maran, hala’o uluk serimónia fó omenajen ba eroi no martires sira hodi tau ai-funan iha Monumentu Masakre Setembru Negro 1999.
Notísia Relevante: Lere husu ba líder sira tenke hamutuk
Molok atu tau ai-funan, Vise-Xefe Estadu Maiór F-FDTL, Majór Jenerál, Falur Rate Laek hateten ema hotu tenke hahí no hanai ba éroi no martires sira-ne’ebé mate hodi fó sira-nia isin no raan tanba ho sira-nia sakrifísiu mak bele lori rai-lulik Timor-Leste sai nasaun ne’ebé soberanu.
“Ita konsentra iha fatin ida-ne’e liu-liu ba autoridade, posoál sira, ita hotu iha ne’e hahí no hanai ba ita-nia éroi no martires sira ne’ebé fó sira-nia isin no raan, no hein sira bele haksolok ho ita,” Major Jenerál Falur Rate Lake hateten liuhosi nia diskursu antes atu tau ai-funan iha Monumentu Setembru Negro 1999, kuarta ne’e.
Nia dehan, tenke hanoin mós matebian sira-ne’ebè mate tanba vitória ba ukun rasik an ne’e nu’udar vitória koletiva ida.
“Ita hatene vitória ne’ebè mak ita hetan ne’e vitoria koletiva. Agradese ita-boot sira-nia prezensa ho laran no domin ba ita-nia martires sira, halo sira kontente hodi tulun ita. Luta ne’ebè ita hetan bele hetan susesu liu atu halo perfurasaun mina-rai ne’e fonte riku soin rai nian,” Falur hateten.
Hafoin diskursu, Xefe Estadu Maiór Jenerál F-FDTL, Tenente Jenerál Lere Anan Timur, Vise-Xefe Estadu Maiór F-FDTL, Majór Jenerál, Falur Rate Laek, Primeiru-Ministru Taur Matan Ruak tau ai-funan iha Monumentu Setembru Negro 1999, ne’ebé akompañadu hosi Ministru Petróleu no Minerál, Vise-Ministru Administrasaun Estatál, Prezidente Konsellu Veteranu, Administradór no entidade sira hotu.
Notísia Relevante: Kompañia Timor Resources promete sei emprega Covalima-oan 97%
Jornalista : Celestina Teles
Editór : Cancio Ximenes
