VIQUEQUE, 09 novembru 2021 (TATOLI)–Ekipa Autoridade Inspesaun no Fiskalizasaun Atividade Ekonómika no Sanitária, Institutu Públiku (AIFAESA, I.P) hetan ona autorizasaun hosi Administrasaun munisipál hodi halo inspesaun no fiskalizasaun ba operadór ekonómiku sira iha munisípiu Viqueque.
“Atividade ne’e atu kontrola presu sasán, prazu produtu no lisensa komersiál,” Xefe Seksaun Atividade Ekonómika no Indústria, Carlos Mateus Ximenes, hateten ba Agência TATOLI, hafoin ramata enkontru ho Sekretáriu Administradór munisípiu Viqueque, iha sala enkontru administrasaun, tersa ne’e.
Nune’e mós, inisiativa ne’e atu kontrola atividade negósiu no aproveita esplika regulamentu negósiu ba negosiante sira iha Viqueque.
“Tuir planu ne’ebé iha, inspesaun realiza kada fulan-tolu no daudaun ami sei ba halo inspesaun no fiskalizasaun iha postu Ossu, aban bá Uatucarbau, no bain-rua iha postu Viqueque villa. Nune’e, fulan-tolu mai tan maka ami tama bá postu Uatulari no Lacluta,” nia akresenta.
Notísia relevante: AIFAESA prende tabaku ilísitu 117 no joker kaixa tolu
Ekipa AIFAESA, I.P sei tun direta ba kios no loja sira hodi haree produtu sira-nia validade, presu no lisensa ba negósiu nian.
“Bainhira inspesaun mak identifika negosiante sira laiha lisensa negósiu, ami sei haruka ba trata lisensa negósiu,” nia tenik.
Autoridade mós sei haree operadór ekonómiku sira ne’ebé komete infrasaun hanesan fa’an produtu liu prazu no fa’an produtu ilísitu ne’ebé lei bandu.
Iha fatin hanesan, Sekretáriu Administradór munisípiu Viqueque, José da Costa de Sousa, agradese ba ekipa AIFAESA, I.P ne’ebé mai Viqueque hodi halo inspensaun ba atividade ekonomia sira.
“Ha’u agradese ba ekipa bele tun mai hodi halo inspesaun atividade ekonomia no bele esplika buat ruma ba negosiante sira ne’ebé hala’o hela negósiu iha munisípiu Viqueque,” nia dehan.
Antes ne’e, Koordenadór SERVE, I.P sukursál Viqueque, Josenito Pereira de Jesus, hateten, negosiante kiik hanesan kios iha munisípiu Viqueque barak mak seidauk halo rejistu komersiál, tanba ne’e presiza kontrola.
“Ha’u haree populasaun Viqueque ne’ebé hala’o negósiu balun rejista ona, maibé negosiante balun to’o agora seidauk mai rejista,” nia dehan.
Tuir dadus, negosiante ne’ebé rejista foun iha SERVE, I.P iha Viqueque hamutuk 100, renova 154 no alterasaun 31.
Jornalista : Vitorino Lopes da Costa
Editora : Julia Chatarina
