DILI, 11 novembru 2021 (TATOLI)— Governu liuhosi Komisaun Interministeriál ba Elaborasaun no Koordenasaun Planu Vasinasaun kontra COVID-19 planeia atu halo destroisaun ba vasina AstraZeneca hamutuk 14.180, tanba liu ona prazu.
“Vasina AstraZeneca ne’ebé nia loron validade liu ona iha 31 outubru hamutuk 14.180 no daudaun Serbisu Autónomu Medikamentu no Ekipamentu Saúde (SAMES) mós rekolla vasina liu prazu iha munisípiu sira, hafoin halo destroisaun,’’ Portavós Komisaun ba Elaborasaun no Koordenasaun Planu Vasinasaun Kontra COVID-19, Danina Coelho, hateten ba jornalista sira iha edifísiu MSSI, Caicoli, kinta ne’e.
Iha biban hanesan, Diretór Ezekutivu SAMES, Santana Martins, informa, daudaun esforsu rekolla vial vasina liu prazu iha armazein no munisípiu sira atu halo destroisaun.
“Diretór sira hosi munisípiu tenke relata mai iha Ministériu Saúde kuantidade no vial sira ne’ebe mak liu ona validade, hafoin autoriza atu halo destroisaun,’’ Diretór ne’e relata.
Tanba, SAMES atu halo destroisaun presiza iha sasin hanesan Ministériu Saúde, Autoridade Seguransa, Autoridade Inspesaun no Fiskalizasaun Atividade Ekonómika no Sanitária (AIFAESA).
Entertantu, Governu Timor-Leste simu ona vasina COVID-19 husi doadór sira hanesan Covax facility, Nova Zelandia, Austrália, Xina, Portugál no Japaun hanesan vasina AstraZeneca hamutuk 1.012.650, SINOVAC 100.000 no Pfizer 100.620.
Tuir dadus hosi Komisaun Interministeriál ba Implementasaun vasina COVID-19, hatudu populasaun iha territóriu nasionál ne’ebé simu ona vasina doze daruak ka kompletu atinje ona 51,0%, ne’ebé ekivalente ho 384,744.
Ba populasaun ne’ebé simu ona vasina doze dahuluk iha munisípiu Dili hamutuk 178,386 ho 83,4% no doze daruak hamutuk 158.621 ho 74,2%.
Nune’e mós, kobertura vasinasaun ba populasaun idade 12 to’o menus hosi 18, hahú iha loron 27 outubru to’o loron 10 novembru 2021 ba doze dahuluk iha munisípiu Dili hamutuk 15.002 ho 25,9%.
Notísia Relevante: Vasina doze daruak iha territóriu nasionál atinje ona 51%
Jornalista : Felicidade Ximenes
Editór : Florencio Miranda Ximenes
