DILI, 11 novembru (TATOLI)— Tuir dadus hosi Komisaun Interministeriál ba Implementasaun vasina COVID-19, hatudu populasaun iha territóriu nasionál ne’ebé simu ona vasina doze daruak ka kompletu atinje ona 51,0%, ne’ebé ekivalente ho 384,744.
“Ema sira ne’ebé mak simu ona vasina iha Timór laran tomak ba doze dahuluk hamutuk 576,834 ho 76,4% no doze daruak 384,744 ho 51,0%,’’Portavóz Komisaun Interministerial ba Implementasaun vasina COVID-19, Danina Coelho, hateten ba jornalista bainhira halo atualizasaun vasinasaun COVID-19, iha salaun MSSI, Caicoli, kinta ne’e.
Notísia Relevante: Progresu vasina Pfizer doze dahuluk atinje ona 8.3%
Ba populasaun ne’ebé simu ona vasina doze dahuluk iha munisípiu Dili hamutuk 178,386 ho 83,4% no doze daruak hamutuk 158.621 ho 74,2%.
Nune’e mós, kobertura vasina ba populasaun idade 12 to’o menus hosi 18, hahú iha loron 27 outubru to’o loron 10 novembru 2021 ba doze dahuluk iha munisípiu Dili hamutuk 15.002 ho 25,9%.
Governu kontinua enkoraja ba populasaun tomak atu partisipa kampaña imunizasaun hodi simu doze dahuluk no daruak atubele ajuda proteze aan hosi infesaun grave COVID-19.
“Ami sente haksolok tebes ita bele atinje ona etapa importante hodi hala’o kobertura liu 75% ba doze dahuluk no 50% doze daruak ba populasaun ho tinan 18 ba leten. Ita mós inisia ona vasina ba labarik sira tinan 12 ba leten ne’ebé iha redusaun makaas ba númeru infesaun grave COVID-1919,’’ Portavóz ne’e agradese.
Tanba, Pandemia globál seidauk ramata ba sidadaun sira ne’ebé seidauk vasina sei iha situasaun vulneravél hodi hetan infensaun no risku bo’ot ba tratamentu iha ospitál no bele rezulta mós ho óbitu.
Governu Timor Leste simu ona vasina COVID-19 husi doadór sira hanesan Covax facility, Nova Zelandia, Austrália, Xina, Portugál no Japaun hanesan vasina AstraZeneca hamutuk 1.012.650 SINOVAC 100.000 no Pfizer 100.620.
Notísia Relevante: COVID-19: kazu detetadu pozitivu tolu no ativu 13
Jornalista : Feliciddae Ximenes
Editór : Florencio Miranda Ximenes
