VIQUEQUE, 15 novembru 2021(TATOLI)—Aldeia rua iha suku Afaloikai, postu administrativu Uatucarbau, munisípiu Viqueque, ho inisiativa rasik kee dalan hodi komunidade lokál bele asesu.
“Aldeia rua hanesan Kaiwalita no Dar-lari laiha estrada. Entaun ami-nia komunidade ho inisiativa no voluntáriu, kee rasik estrada hodi sira asesu, tanba povu presiza nesesidade bázika hanesan estrada, bee-moos no eletrisidade. Bainhira laiha, bele difikulta ba komunidade lori produtu ba merkadu,” Xefe suku Afaloikai, Agustinho Pinto, hateten ba Agência TATOLI, segunda ne’e.
Aleinde estrada, komunidade Afaloikai preokupa mós ba bee-moos, tanba tempu udan bee iha, maibé tama ba tempu bailoron, komunidade susar asesu bee-moos.
Nune’e mós, komunidade hosi aldeia rua hanesan Lekuala no Lako’o seidauk asesu eletrisidade.
Notísia relevante: MOP lansa projetu eletrifikasaun iha suku Rairobo
“Ho preokusaun hirak ne’e, ami husu Governu liuliu parte kompetente sira atu tau matan ba ami-nia povu nia preokupasaun. Se ami ko’alia imi la fiar, di’ak liu tun diretamente mai haree situasaun iha suku Afaloikai,” nia akresenta.
Tuir dadus, suku Afaloika kompostu hosi aldeia haat Lekuala uma-ka’in 25, Lako’o uma-kain 114, Kaiwalita uma-kain 125 no Dara-lari uma-kain 115, ho totál abitante hamutuk 1.866, hosi totál uma-kain 369.
Notísia relevante: MOP anunsia ona rezultadu konkursu estrada rurál Dili no Viqueque
Antes ne’e, Ministériu Obra Públika (MOP) prosesa ona projetu estrada iha munisípiu Baucau, Ainaro, Manatuto, Dili, Manufahi, Laútem no Viqueque, hamutuk pakote 67, ne’ebé Diresaun Nasionál Aprovizionamentu (DNA) konsege finaliza evaluasaun dokumentu tékniku no finansiál ba kompaña lokál hamutuk 60-resin ne’ebé kompete pakote estrada rurál hamutuk 37.
Aleinde ne’e, Eletrisidade de Timor-Leste, Empreza Públika (EDTL, E.P) loke konkursu eletrifikasaun nasionál hamutuk pakote 30 iha suku 33, hosi totál suku 76 iha territóriu nasionál ne’ebé seidauk asesu, ne’ebé daudaun MOP lansa ona projetu pakote balun iha suku sira.
Jornalista : Vitorino Lopes da Costa
Editora : Julia Chatarina
