COVALIMA, 15 novembru 2021 (TATOLI)—Adjuntu Sekretáriu Administrasaun Munisípiu Covalima, Francisco Alves, husu ba líder komunitária atu halo observasaun ba atividade perfurasaun mina posu Feto Kmaus iha aldeia Tabacolot, sukuu Debos, post Suai, Munisípiu Covalima.
Notísia Relevante: ANPM observa ‘well kick’ perfurasaun iha posu Feto Kmaus
“Iha atividade pefurasaun mina posu foin lalais ne’e akontese mina-teen suli tuir balleta no tama populasaun nia to’os laran, tanba karik kompañia Timor Resources la halo jestaun di’ak. Entaun, ha’u husu ba líder komunitária sira tenke observa no tau matan,” Francisco Alves hateten ba jornalista sira iha Salaun Administrasaun Munisipál, Covalima, segunda ne’e.
Nia husu ba líder komunitária sira tenke halo observasaun ho didi’ak tanba foin mak halo perfurasaun mina-matan ida de’it, hasoru ona problema mina-teen suli estraga to’os, satán mina-matan seluk ne’ebé mak identifika ona no halo tan perfurasaun.
Nia husu ba xefe suku Matai, Camansa, Belekasak no Suai Vila atu tau atensaun no fó nafatin informasaun ba administrasaun munisípiu Covalima, Ministériu Petróleu no Minerál atu tau hanoin hamutuk hodi rezolve problema ne’ebè mak akontese, nune’e labele aumenta tan problema.
Xefe Suku Matai, João Gusmão, hateten maske kompañia Timor Resources rezolve ona problema relasiona ho akontesimentu mina-teen suli no afeta ba komunidade nia to’os, maibé durante ne’e autoridade lokál la tama ba laran no observa hosi li’ur de’it.
Antes hahú halo perfurasaun mina ne’e, koordenasaun entre autoridade lokál ho kompañia la’o di’ak tebes, maibé foin lalais mina-teen sulin tuir balleta ne’e hanesan dezastre ida-ne’ebé la espera atu akontese, tanba ne’e hosi ANPM halo ona observasaun no rezolve ona.
Bazea ba observasuan Autoridade Nasionál no Petróleu (ANPM) nota katak foin lalais ne’e akontese “well kick” hanesan termu teknika ida iha indústria petrolifera, espesifikamente iha atividade perfurasaun ne’ebè akontese, tanba tebe hosi gás iha fatin rezervatóriu kiik balun ne’ebè iha gás ka idrokarbonetu hodi rezulta ba influkxu idorkarbonetu balun (mixtura gás-mina no tahu/lama).
Notísia Relevante: ANPM observa ‘well kick’ perfurasaun iha posu Feto Kmaus
Jornalista : Celestina Teles
Editór : Cancio Ximenes
