DILI, 25 novembru 2021 (TATOLI)–Eis Prezidente Repúblika, José Manuel Ramos Horta, konsidera Governu presiza investe maka’as iha setór edukasaun, nune’e bele rezolve problema ne’ebé iha.
“Governu tenke trata kondisaun estudante ho dignu, apoiu importante maka tau-matan ba kondisaun estudante hanesan selu hahán, hela fatin, bee-moos, inklui fasilita kontrolu saúde ho doutór sira kada tinan. Kuandu iha moras ruma sira tenke hetan kedan tratamentu intensivu. Ida-ne’e mak dalan atu investe iha área edukasaun, maibé to’o agora ha’u la haree Governu hanoin atu halo ida-ne’e,” Horta hateten hafoin ramata palestra iha semináriu komemorasaun Loron Proklamasaun Independénsia 28 novembru, iha kampus FSS Universidade Nasionál Timor-Lorosa’e (UNTL), Caikoli, kinta ne’e.
Tuir Horta, investimentu iha setór edukasaun, tenke hahú hosi pre-eskolár to’o universitáriu.
“Ha’u fuan kanek bainhira rona estudante sira sena malu iha uma a’at nia laran, sira aluga kada fulan selu $30 to’o $50, bee laiha no sintina mós laiha,” nia akresenta.
Nune’e, nia sente triste tanba dala ruma hasoru malu ho estudante sira no bainhira husu kondisaun, sempre simu resposta laduun di’ak.
“Kestaun ne’e bele afeta ba labarik ninia konsentrasaun simu matéria ho di’ak. Governu labele hanoin de’it katak selu ona propina bele ajuda kondisaun estudante ka aselera ona setór edukasaun iha Timor-Leste, tanba haree didi’ak Governu to’o agora seidauk fó apoiu maka’as ba setór edukasaun,” Horta dehan.
Iha sorin seluk, Premiadu Nobel Paz, José Manuel Ramos Horta, husu ba VIII Governu konstitusionál atu kria polítika klaru apoiu agrikultór kiik sira ne’ebé moris iha área remota.
“Povu agrikultór sira ne’ebé moris iha foho, daudaun ne’e buka osan hodi fó moris ba família tanba Governu la kria kondisaun ne’ebé klaru, produtu agrikultór atu ba ne’ebé? Governu tenke apoiu halo sirkulasaun produtu ba merkadu, hosi munisípiu mai Dili. Ida-ne’e la presiza estudu barak hodi bele halo serbisu ba área ne’e,” nia subliña.
Nia mós sujere ezekutivu sira koordena ho banku atu sai instrumentu apoiu ba investidór sira.
“Banku labele sai fali autór hodi oho fali investidór sira ho funan todan demais, maluk timor-oan sira iha setór privadu barak halerik tanba sira-nia negósiu mout tanba funan ne’ebé banku fó todan demais,” nia tenik.
Jornalista : Tomé Amado
Editora : Julia Chatarina
