COVALIMA, 25 novembru 2021 (TATOLI)—Diretór Servisu Agrikultura Munisípiu Covalima, Zeferino Guterres informa, mudansa klimatika fó ameasa ba produsaun hare iha munisípiu Covalima.
“Ita presiza esforsu nafatin oinsá mak ita bele halo espansaun, ita presiza fó atensaun ba fatór barak makaas hodi kontribui iha produsaun rasik. Tanba Mudansa klimatika sai ameasa ba produsaun hare, iha mudansa risku no ameasa ba agrikultór sira,” Zeferino Guterres hateten ba Agência Tatoli iha Santa Rosa, Covalima, kinta ne’e.
Nia hatutan, kada tinan Governu esforsu hodi dezenvolve agrikultura liuhosi setór oioin maske halai natar luan, maibé tempu bai-loron naruk no previzaun katak la-niña sei akontese no sei estraga hotu produsaun hare no batar.
“Produsaun ne’ebé mak tinan tinan ita prodús iha munisípiu Covalima, ita-nia ai-han sufisiente bazea ba dadus ita-nia kultivasaun ne’ebè iha. Ita presiza atu esforsu nafatin, oinsá atu resposta ai-han iha munisipiu Covaima. Papel importante ba ita hotu autó ba dezenvolvimentu liu-liu ba povu agrikultura autoridade nivel postu no suku atu haree no fó atensaun ba kestaun ida-ne’e,” nia hateten.
Munisípiu Covalima, área potensiál ba agrikultura ba natar ne’ebé prodús hare kuaze ektare 12,167, potensiál ba to’os ne’e ektare 22,288.
“Ita iha área potensialidade ba agrikultura iha munisípiu Covalima, natar kuaze ektare 12,167 ne’ebé potensiál no to’os ektare 22,288. Oras ne’e daudaun iha ita-nia natar ne’ebè oras ne’e existe daudaun, ita prodús hare iha natar ektare 2,772.38 no to’os ektare 4.235.15,” nia dehan.
Jornalista : Celestina Teles
Editór : Cancio Ximenes.
