COVALIMA, 07 dezembru 2021 (TATOLI)—Centro Nasionàl Chega (CNC) fasilita estudante sira vizita fatin istóriku sira iha munisípio Covalima hodi selebra loron invazaun Indonézia, ne’ebé liuhusi Lei númeru 3/2016, 25 maiu, eleva loron 7 dezembru nu’udar Loron Memória.
“Iha tinan ida-ne’e, Centro Nasional Chega (CNC) deside hodi halo komemorasaun loron Nasional Memória ne’ebè mak monu iha iha munisipio Covalima ne’e, hanesan maneira ida atu introdús memória pasada partikularmente ba ita-nia jerasaun foun sira. Ema hotu hatene loron 7 dezembru 1975 Indonézia mai invade Timor-Leste, no tanba ema iha munisipiu barak mak seidauk hatene istória pasada sira-ne’e,” Diretòr Ezekutivu CNC, Hugo Maria Fernandes, hateten ba jornalista sira iha Monumentu Setembru Negro Suai, Covalima, tersa ne’e
Diretór ne’e hateten, loron ohin CNC organiza “Chega Tour” ne’e partikularmente ba estudante sira hosi Suai Vila ba fronteira Salele. hanesan dalan ida atu introdús memória pasada ba jerasaun foun sira.
CNC fasilita estudante ho preokupasaun ida tanba memória pasada ladún hanorin ba estudante iha eksola laran, entaun vizita fatin istóriku ne’e dalan ida atu introdús istória ba estudante sira.
Ho nune’e, CNC hakarak estudante sira rona diretamente hosi sasin violasaun direitu umanu haktuir sira-nia sasin, hanesan meiu ida-ne’ebè mak efetivu liu hodi haktuir lisaun memória pasada ba jerasaun foun sira atu hatene.
Iha vizita ne’e, partisipa hosi Diretór Centro Nacional Chega Hugo Maria Fernandes ho nia ekipa, Prezidente Conselho de Imprensa (CI) Virgílio da Silva Guterres ho nia ekipa, Estudante Eskola Sekundária Jeráll Públika (ESGP) Suai no Eskola Téknika Vokasionáll (ESTV) Claret Salele hodi vizita fatin istóriku iha munisípiu Covalima.
Jornalista : Celestina Teles
Editór : Cancio Ximenes
