iklan

NASIONÁL, HEADLINE, LEI

MTK konkorda ho hanoin Alfándega atu revizaun lei importasaun veíkulu

MTK konkorda ho hanoin Alfándega atu revizaun lei importasaun veíkulu

Jornalista Agência TATOLI, Antónia Gusmão, halo entrevista ho Ministru Transporte no Komunikasaun (MTK), José Agustinho da Silva, iha resintu Parlamentu Nasionál, segunda (13/12). Imajen TATOLI/António Gonçalves

DILI, 13 dezembru 2021 (TATOLI)–Ministru Transporte no Komunikasaun (MTK), José Agustinho da Silva, konkorda ho hanoin Autoridade Aduaneira (AA)/Alfándega atu revizaun Lei númeru 30/2011 kona-ba kondisaun no prosedimentu atu observa relativamente importasaun veíkulu.

“Alfándega nia hanoin di’ak, tanba situasaun tempu ba tempu muda, situasaun tinan-10 liubá hanesan ho agora, karik la relevante ona ho situasaun atuál bele revee lei ne’e ho intensaun hasa’e ita-nia reseita ba kofre Estadu,” Ministru José Agustinho, hateten ba Agência TATOLI, iha resintu Parlamentu Nasionál (PN), segunda ne’e.

Notísia relevante: Alfándega sujere MTK halo revizaun dekretu-lei importasaun veíkulu

Tuir governante ne’e, bainhira iha ona instrumentu legál, bele masimiza rekolla reseita ho esforsu tomak ne’ebé bele halo.

“Nu’udar ema polítiku, servidór Estadu no ezekutór ba Orsamentu Jerál Estadu (OJE), prontu serbisu hamutuk ho entidade sé de’it atu asegura interrese Estadu.  Tanba ne’e, bainhira iha mudansa ba lei ne’ebé iha ho intensaun fasilita entidade hotu atubele rekolla reseita ba kofre Estadu, ita tenki apoia no proteje ho regra, tanba asaun hotu tenki la’o iha korridór nia laran,” nia akresenta.

Tanba ne’e, Ministru afirma vontade tomak fó apoia ba mudansa hotu ne’ebé mak iha tanba lei eziste atu fasilita prosesu.

“Lei ne’ebé ninia karater impede fali prosesu tenki muda, entaun kualker mudansa ne’ebé mak iha importante liu maka defende interese Estadu,” nia tenik.  

Antes ne’e, Komisáriu Alfándega, José António Fátima Abílio, sujere MTK halo revizaun ba lei importasaun veíkulu tanba la adekuadu ona ho situasaun atuál.

Tuir Autoridade Aduaneira, lei ne’e la apropriadu tanba hateten katak veíkulu ne’ebé ninia tinan produsaun liu ona tinan-lima, labele importa ona mai Timór, maibé realidade iha implementasaun la akontese.

Jornalista : Antónia Gusmão

Editora      : Julia Chatarina

iklan
iklan

Leave a Reply

iklan
error: Content is protected !!