DILI, 14 dezembru 2021 (TATOLI)– Sekretáriu Jerál Federasaun Karate-do Timor-Leste (FKTL), Antonio Carlos de Araújo, hateten, iha 2022 foku ba preparasaun atleta sira atleta karate-do foku liu atu partisipa iha jogu rejionál Sea Games ne’ebé realiza iha Vietname, iha loron 12 to’o 23 maiu 2022.
“Ita sei ba partisipa eventu internasionl ida Sea Games, entaun ami prepara ona atleta na’in-rua ou tolu hanesan ne’e atu ba partisipa,” Sekretáriu Jerál FKTL, hateten ba Agência TATOLI iha edifisiu SEJD, Lecidere-Dili, tersa ne’e.
Daudau, FKTL esforsu makas hela atu hetan fundu ruma hosi patrosinadór sira iha Timor-Leste no halo hela proposta hodi haruka ba Governu atubele prevee orsamentu uitoan ba sira hodi halo preparasaun.
“Ami sei prepara proposta atu haruka ba Governu iha 2022 nia atu hetan fundu bele kria mós kampionatu nasionál ida no prepara ita nia atleta ba partisipa iha jogu internasional. Ami mós buka meiu hela atu hetan “sponsor” ruma hodi tulun ami,” nia akresenta.
Alende, Sea Games sei haruka mós atleta balun ba partisipa iha eventu karate-do internasionál Azia ne’ebé sei hala’o mós tinan oin.
Daudaun, atleta ne’ebé rejistu ona iha FKTL hamutuk na’in-3.000 resin, hosi totál ne’e balun membru FALINTIL-Forsa Defeza Timor-Leste (F-FDTL), Polisia Nasional Timor-Leste (PNTL) no balun haknaar an iha instituisaun Estadu nian.
Jornalista : Hortencio Sanchez
Editór : Florencio Miranda Ximenes
