PN aprova orsamentu tinan 2022 ba AACTL iha espesialidade
DILI, 14 dezembru 2021 (TATOLI)–Parlamentu Nasionál (PN) liuhosi diskusaun no votasaun ba Proposta Lei Orsamentu Jerál Estadu (OJE) 2022, tersa ne’e, aprova orsamentu $685.226 ba Autoridade Aviasaun Sivíl Timor-Leste (AACTL, sigla portugés), iha espesialidade, ho rezultadu a-favór 47, kontra 0, no abstensaun 13.
“Nune’e, orsamentu ba AACTL pasa,” Prezidente Parlamentu Nasionál (PPN), Deputadu Aniceto Longuinhos Guterres Lopes, deklara iha sala plenária PN.
Osamentu aprovadu aloka ba saláriu no vensimentu $258.601, bens no servisu $426.626, kapitál menór, kapitál dezenvolvimentu no transferénsia públika laiha.
Verba alokadu sei finansia programa rua hanesan transporte $403.213 no boa governasaun no jestaun instituisionál $282.013.
AACTL iha natureza hanesan instituisaun públika no prosekusaun efikáz ba atribuisaun públika hosi supervizaun regulamentasaun, fiskalizasaun no inspesaun ba setór aviasaun sivíl iha Timor-Leste, tuir artigu 1 dekretu lei númeru 8/2005 16 dezembru.
Jornalista : Arminda Fonseca
Editora : Julia Chatarina
