DILI, 14 dezembru 2021 (TATOLI)– Sekretáriu Estadu Juventude no Desportu (SEJD), Abrão Saldanha, tersa ne’e, asina akordu serbisu ho Prezidente Federasaun Futeból Timor-Leste (FFTL), Francisco Martins da Costa Pereira Jerónimo, hodi dezenvolve futeból Juvenil iha Timor Leste.
“Governu haree dezenvolvimentu iha futeból Juvenil ne’e importante tebes atu prepara futebolista timór-oan di’ak liután ba nasaun ida ne’e iha futuru. Ida ne’e mak ita halo akordu ida ne’e ho FFTL tanba sira mak iha liu espesialidade kona-ba futeból nian,” Sekretáriu Estadu Abrão, hateten iha ámbitu asina akordu iha edifisiu SEJD,Lecidere-Dili, tersa ne’e.
Notísia Relevante: SEJD aloka $25.000 realiza kompetisaun jogu futeból juveníl
Akordu ne’e fó biban ba parte Governu hamutuk ho FFTL hodi oinsá halo rekrutamentu ba treinadór no fasilidade ba jogadór sira.
Iha fatin biban hanesan, Prezidente FFTL, Francisco Martins da Costa Pereira Jerónimo, hateten, akordu ne’ebé parte rua asina atu deznevolve futeból juvenil no sei implementa prosesu hotu iha fulan janeiru 2022.
“Hahú janeiru 2022 ba oin, ami sei halo kooperasaun di’ak hodi implementa akordu ne’e rasik hodi dezenvolve futeból juvenil liuhosi sentru sira atu buka fini ba jogadór Timor -Leste nian iha futuru,” Atuál Ministru Asuntu Parlamentar no Komunikasaun Sosiál (MAPKOMS) ne’e garante.
Daudaun, Sentru Juvenil ejiste ona iha territóriu nasionál hotu inklui Rejiaun Administrativu Espesiál Oé-Cusse no Ambeno (RAEOA).
Notísia Relevante: FFTL hahú normaliza treinamentu ba juveníl
Jornalista : Hortencio Sanchez
Editór : Florencio Miranda Ximenes